Тошкент вилоятининг Тошкент туманида Damas автомобилида 77 кглик картошка кўринишидаги гиёҳвандлик воситалари тўхтатиб қолинди. Бу 13 январь куни Давлат божхона қўмитаси контрабандага қарши курашиш бош бошқармаси ва ДХХ ўтказган тезкор тадбирда аниқланган.

«Ўзбекистон 24» телеканалида эфирга узатилган репортажда, туманнинг «Ҳасанбой» маҳалласида Damas`га бир неча хўжалик қопларини юклаётган шахслар қўлга олингани маълум қилинган.

«Ушбу қоплар белгиланган тартибда ва холислар иштирокида текширилганида, уларнинг ичида картошка кўринишига келтирилган 481 дона ўрамлар борлиги аниқланди. Мазкур ўрамлар очиб кўрилганида, ўрами билан ҳисобланганда жами 77 кг 95 граммни ташкил қилувчи опий ва гашиш гиёҳвандлик воситалари яширилган экан», — деди ДБҚ матбуот хизмати бошлиғи Ҳусан Тангриев.

Тезкор тадбир давом эттирилганда, гиёҳвандлик воситаларини қабул қилиб олиши керак бўлган хорижий давлат фуқароси ҳам қўлга олинган.

Шунингдек, ҳозирда бунга алоқадор бошқа шахсларни аниқлаш чоралари кўрилмоқда.

Ҳолат юзасидан жиноят иши қўзғатилиб, тергов ҳаракатлари олиб борилмоқда.