«Капиталбанк» банкоматлари иши вақтинча тўхтатилади. Банк матбуот хизмати буни техник ишларни амалга ошириш билан изоҳлади.

«Банкоматлар орқали амалга ошириладиган барча операцияларни „Капиталбанк“ АТБнинг барча филиалларида амалга ошириш мумкин», — дейилади хабарда.

Банкоматлар ўртача етти кун давомида босқичма-босқич ўчирилади. Ўчириш март ойининг ўрталарига қадар давом этади. Банкоматларни босқичма-босқич тўхтатишнинг батафсил графиги бу ерда келтирилган.

Марказий банк маълумотларига кўра, 2021 йил 1 декабрь ҳолатига мамлакатдаги барча банкомат ва инфокиоскларнинг 25 фоизи «Капиталбанк»га тегишли.

Мамлакатда жами 12,8 мингта банкомат бор. Булардан 3,2 мингтаси «Капиталбанк»га тегишли, Агробанк (1894) ва Халқ банки (1331) катта фарқ билан иккинчи ҳамда учинчи ўринларни эгаллаган.

Эслатиб ўтамиз, бундан олдин Алишер Усмоновга тегишли USM Holdings компаниясининг шўъба корхонаси бўлган «Телекоминвест» МЧЖ «Капиталбанк» устав капиталининг 8,33 фоизини сотиб олган эди. Эндиликда ушбу компания «Капиталбанк»нинг 25 фоиз улушига эга.