Қозоғистон президенти Қасим-Жомарт Токаев мамлакат парламенти мажлисида нутқ сўзлади.
У икки кундан кейин Коллектив хавфсизлик шартномаси ташкилоти тинчликпарвар контингентини босқичма-босқич олиб чиқиш бошланишини маълум қилди.
«КХШТ тинчликпарвар кучларининг асосий миссияси муваффақиятли якунланди. Икки кундан кейин босқичма-босқич олиб чиқиш бошланади. Контингентни олиб чиқиш жараёни 10 кундан ортиқ давом этмайди», — деди президент. Шунингдек, у аксилтеррор махсус операцияси ўткир босқичидан ўтганини айтди.
Давлат раҳбари Қозоғистон ҳуқуқ-тартибот идоралари ўз вақтида террорчилик таҳдидининг олдини олиш билан шуғулланмаганини таъкидлади.
«Жамиятимизнинг ҳамжиҳатлигини қатъиятли равишда, жумладан профессионал тарзда ишлаб чиқилган сценарийларга асосланган норозилик акциялари орқали заифлаштиришди. Радикал чораларнинг аниқ иштирокчилари яширин тарзда тайёрланди», — деди у.
«Миллий хавфсизлик қўмитаси ваколатли орган сифатида бу қўпорувчилик ишига аниқ баҳо бера олмади ва беришни ҳам хоҳламади. Миллий хавфсизликка жиддий таҳдидни кўра олмади. Ҳужумлар ташкилотчиларини ҳар қандай ҳолатда ҳам пайдо бўлиши мумкин бўлган имкониятни топишгина тўхтатиб турган эди», — деди Қасим-Жомарт Токаев.
Мамлакатга қарши террорчилик уруши бошланди, деди у яна. «+окимиятни эгаллаб олишга тайёргарлик устида профессионаллар иш олиб бордилар… Тушуниш керак: қарор қабул қилинган вақтда [КХШТга ёрдам сўраб мурожаат қилиш] биз террорчиларга харобага айлантириш учун берилган Олмаота устидан назоратни бутунлай йўқотишимиз мумкин эди. Олмаотадан айрилсак, пойтахтни ҳам, кейин эса бутун мамлакатни йўқотган бўлардик», — деди давлат раҳбари.
Қасим-Жомарт Токаев Олмаота полиция департаменти биносини эгаллаб олмоқчи бўлган бандитлардан кетма-кет икки кеча ҳимоя қилган полициячиларнинг жасоратини қайд этди.
Шу билан бирга, президент ҳамма ҳам ўз бурчига садоқатли эмаслигини таъкидлади. «Қатор шаҳарларда миллий хавфсизлик бошқармалари раҳбарлари етарлича ҳарбий арсеналга эга бўлишларига қарамай, жанговар ҳаракатларга киришмай, хизмат биноларини тарк этиб, у ерда қурол-яроғ ва махфий ҳужжатларни қолдириб кетишган», — деди давлат раҳбари.
Аввалроқ президент Қасим-Жомарт Токаев мамлакат ой аввалида бошидан кечирган инқироз мустақилликнинг 30 йиллик тарихидаги энг оғири бўлгани, бу жанговар ҳаракатларнинг барчаси бир марказдан мувофиқлаштирилганини маълум қилган эди. Давлат раҳбари эълон қилган маълумотларга кўра, ҳодисаларда 16 нафар ҳуқуқ-тартибот ходими ҳалок бўлган, 1300 дан ортиқ киши жароҳатланган. Тинч аҳоли орасида ҳам қурбонлар бор, аниқ сони аниқлаштирилмоқда. Мамлакат бўйлаб 1270 та тадбиркорлик субъекти зарар кўрди. 100 дан ортиқ савдо марказлари ва банклар талон-торож қилинди, полиция машиналарига зарар етказилди ва 500 га яқин техника ёқиб юборилди.
