Алишер Усмоновнинг USM Holdings компанияси шўба корхонаси «Телекоминвест» «Капиталбанк» акциядорлик жамияти банкининг қўшимча акцияларини харид қилди. Бу ҳақда «Тошкент» республика фонд биржаси хабарида маълум қилинди.
10 январь кунги биржа савдоларида Алишер Усмонов компанияси банкнинг 32,98 млн дона акциясини ёки устав капиталининг 8,33 фоизини сотиб олди. Эндиликда ушбу компания «Капиталбанк»нинг 25 фоиз улушига эгалик қилади.
2021 йилнинг ноябрь ойида «Капиталбанк» 215,3 млрд сўмлик акциларининг қўшимча эмиссиясини жойлаштирган эди. Ушбу акцияларни «Телекоминвест» МЧЖ сотиб олган эди. Шундан буён Усмонов компанияси банкнинг 16,6 фоиз акциясига эгалик қилиб келаётганди.
2019 йилда Ойбек Турсуновга қарашли Promadik Invest компанияси «Капиталбанк» банкининг 40,13 млн дона (36 фоиз) акциясини сотиб олганди. Ўша йили мазкур битим банк секторидаги энг йирик келишувлардан бирига айланганди.
2021 йил 1 ноябрдаги сўнгги битимдан кейин Promadik Invest аффилланган шахслар рўйхатидан чиқарилиб, унинг ўрнига Ойбек Турсуновнинг ўзи қўшилганди.
Кейинроқ президентнинг куёви Ойбек Турсунов «Капиталбанк» уставидаги 112,49 млн акцияларини сотиб олиб, ўзининг жами улушини 50 фоизга етказгани ҳақида хабар берилганди. Акциядор банкнинг 112,49 млн акцияларини сотиб олди — бу қимматли қоғозлар умумий сонининг 34,1 фоизи дегани. Бунга қадар у 52,43 млн донага эгалик қилиб келган.
Spot нашрига кўра, декабрь ойи охирида «Капиталбанк» ўз қимматли қоғозларини эгаларидан ҳар бир акция учун 0,30 доллардан қайтариб сотиб олишини эълон қилган. Сотиб олиш жараёни 5 январда бошланган.
