Душанба куни АОКАда бўлиб ўтган матбуот анжуманида Санитария-эпидемиологик осойишталик ва жамоат саломатлиги хизмати бошлиғининг биринчи ўринбосари Холмамат Норбоев карантин чекловлари қайта тикланишга оид саволга ҳам жавоб берди.
«Чеклов тадбирлари кўзда тутилаётгани йўқ. Чекловларни олдини олишнинг бирдан бир йўли — эмланиш. Ҳаммамиз эмлансак, (карантин) чекловлар қайтмайди», — деди у.
Анжуманда шунингдек, соғлиқни сақлаш вазири ўринбосари — Тошкент шаҳар соғлиқни сақлаш бош бошқармаси бошлиғи Анвар Алимов эса омикроннинг клиник кўринишларига тўхталиб ўтди.
«Омикрон» асосан 5−6 та клиник кўринишда кузатилди. Булар — йўтал, аксириш, кучли ҳолсизланиш, бурундан сув оқиши, ҳар икки касалдан биттасида иситма кўтарилиши. Ҳозирда бу штамм ўрганилмоқда. Япон олимларининг айтишича, бу штаммнинг юқиш хавфи «Дельта» вариантидан 4 баравар кўпроқ", — деди у.
Анвар Алимов. Фото: ССВ.
Таъкидланишича, «омикрон эмланганлар орасида жуда енгил кечади, асосан юқори нафас органларида инфекция тез кўпаяди».
«Бунда ўпкадаги касаллик кўрсаткичлари „дельта“ вариантидан бир-неча баравар камроқ. Касалликни даволаш схемаларида эса ҳеч қандай фарқ йўқ. „Уҳан“ ҳамда „дельта“ штаммда қўлланган тадбирлар бу вариант учун ҳам 100% ўринли. Бу ўрта ёшлиларда енгил кечади. Аммо, хроник касаллиги бор беморларда бу жуда ҳам оғир ўтиб, хатто ўлимгача ҳам олиб бориши мумкин», — деди Анвар Алимов.
Тиббиёт ходимларининг касбий малакасини ривожлантириш маркази директори Хабибулла Оқилов эса омикрон яшин тезлигида тез тарқалишини қайд этди.
«Бу вариантнинг «дельта» вирусдан фарқи шунда-ки, у яшин тезлигида тарқалаётгани ҳамда нисбатан осонроқ кечишида 5 кунда тузалиб кетиш мумкин. 98% беморлар, уй шароитида даволанса бўлади. Ўпкага асорат бериш фоизи «Дельта»дан кўра, бир неча маротаба камроқ», — деди у.
Хабибулла Оқилов. Фото: ССВ.
Тайёргарлик жараёнларига тўхталган мутахассис, ҳозирги кунда Тошкентда «Зангиота-1» ҳамда «Зангиота-2» шифохоналари ҳамда вилоятлардаги махсус клиникаларда ишлаётган шифокорларнинг ҳаммаси коронавирус ва айнан «Омиcрон» штамм учун ўқитилганини таъкидлади. «Агар мажбур бўладиган бўлсак, «омикрон»га тайёргарлик бўйича уларни бошқаттан ўқитиб чиқамиз», — деди Хабибулла Оқилов.
