Ўзбекистонда коронавируснинг омикрон штамми аниқланиши ва айрим карантин чекловлари белгиланиши ортидан ижтимоий тармоқларда ниқоб тақмаётган фуқаролар БҲМнинг 5 баравари миқдорида жаримага тортилаётгани ҳақида гап сўзлар тарқалди.
АОКАда бўлиб ўтган матбуот анжуманида Коронавирусга қарши курашиш штаби аъзоси, Тиббиёт ходимларининг касбий малакасини ривожлантириш маркази директори Ҳабибулла Оқилов ушбу масалага изоҳ берди.
«Куни кеча бош вазир (Абдулла Арипов) бошчилигида махсус комиссиянинг йиғилиши бўлди. Милиция, Миллий гвардия ходимларига кўчада юрганда муомалани тўғри қилиб, ўша ниқобсиз бўлган фуқарога биринчидан тушинтириш, фақатгина огоҳлантириш (топшириғи берилди). Кейин Милицияга ҳам, Гвардияга ҳам бугундан тарқатила бошлаган ниқоблар — ўша йўлда тўхтатган ходим ўзи ниқобни „илтимос шуни тақиб олинг“ деб беради. Ҳеч қандай жарима тўғрисида гап йўқ», — деди Ҳабибулла Оқилов.
Аввалроқ, Санитария-эпидемиологик осойишталик хизмати бошлиғининг биринчи ўринбосари Холмамат Норбоев илк «омикрон» аниқланган бемор билан бирга самолётда 130 нафар ўзбекистонлик, 70 нафар чет эл фуқароси бўлганини ва уларнинг барчаси карантинга олинганини маълум қилганди. У шунингдек, Ўзбекистонда омикрон 7 январь куни аниқланса-да, 8 январь кунги хабарда омикрон аниқланмагани айтилганига изоҳ берганди.
Бундан ташқари, Холмамат Норбоев карантин чекловларини жорий этиш кўзда тутилаётгани йўқлигини таъкидлаганди. «Ҳаммамиз эмлансак, чекловлар қайтмайди», — деди у. Қолаверса, омикрон — йўтал, аксириш, кучли ҳолсизланиш, иситма каби клиник кўринишга эгалиги, ёшларда енгил, хроник касалликлар бор шахсларда эса жуда оғир кечиши айтилди.
