Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков сўнгги кунларда дунёда «омикрон»нинг тарқалиш географияси кенгайиб бораётгани, бироқ, Ўзбекистонда ҳали «омикрон» аниқланмаганини маълум қилди.
«Янги штаммнинг юртимизга кириб келиш эҳтимоли йўқ эмас. Бироқ бу ҳолатдан фойдаланиб, ижтимоий тармоқлар орқали турли ёлғон ва асоссиз ахборот тарқатиш, аҳоли орасида ортиқча ваҳима кўтариш, ўйлайманки, ҳеч бир мезонга тўғри келмайди», — дея унинг сўзларини келтирмоқда ССВ матбуот хизмати.
Унинг таъкидлашича, «омикрон»дан соғайиш муддати қисқа ва касалланганларда шифохоналарга ётиш эҳтимоли паст экани инобатга олинса, «Ўзбекистон вируснинг кўтарилиш хавфига тайёр».
«Бироқ, ортиқча хотиржамликка берилиш ҳам ярамайди. Сабаби „омикрон“ бошқа штаммларга қараганда анчагина юқумли ва қисқа муддатда аҳолининг катта қисмини зарарлаши мумкин. Шу боис айни пайтда карантин қоидаларига қатъий риоя қилиш, эмлаш тадбирларида фаол иштирок этиш ҳар қачонгидан-да муҳим», — деди Нурмат Отабеков.
Унинг фикрича, мамлакатда аввал яхши самара берган амалиётни давом эттириш, жумладан, оилавий шифокор пунктлари ва поликлиникалар орқали «COVID-box» тарқатиш, хасталик енгил кечаётган беморларни амбулатор шароитда даволаш мақсадга мувофиқ. «Бу, ўз навбатида, ихтисослашган тиббиёт муассасаларига ортиқча юкламалар тушишининг ҳам олдини олади», — деди СЭО раҳбари ўринбосари.
Аввалроқ, ЖССТ COVID`нинг янги штаммини Омикрон деб номлаб, уни «хавотирли вариант» деб эълон қилган эди. Шунингдек, ZF-UZ-VAC2001 вакцинаси ҳамда Pfizer-BioNTech вакцинасининг учинчи дозаси Omicron`дан ҳимоя қила олиши маълум қилинганди.
Bloomberg таҳлилларига кўра, 2022 йилда иқтисодий ўсиш учун энг йирик хавф-хатарлардан бири «омикрон» ҳам бўлиши мумкинлиги айтилганди.
