Қишлоқдаги қиш Мадина Аъзам объективида

Қишлоқдаги қиш

Мадина Аъзам объективида

Тез-тез ўчиб турувчи чироқ, печдан тараладиган аччиқ тутун иси, совуқ ҳавода ўчоқда тайёрланган овқат, сандал атрофидаги тушлик. Қишлоқ аҳли қишни қандай ўтказиши — Мадина Аъзам фотоҳикоясида.

Суратлар тавсифини ўқиш учун уларнинг устига босинг.

Ўзбекистонликлар эшигини қаҳратон қиш таққилатганига ҳам бир ойдан ошди. Қишнинг зийнати, таровати, айниқса оппоққина қори ўзгача.

Аммо қишлоқдагилар қишни кўп ҳам орзиқиб кутмайди. Чунки тез-тез ўчиб турадиган чироқ, печдан чиқадиган аччиқ тутун иси, ёмғир-қорли кунларда тандир-у ўчоқда ош-овқат тайёрлаш ҳавас билан кутишга арзирли эмас.

Қишлоқдагилар бу мавсум учун алоҳида ҳафсала билан тадорик кўришади. Қиш ғамини ёзда ейдилар.

Қишлоқдаги бир хонадоннинг дарвозахонаси.

Одатда кўпчилик ҳайвон боқадиганлар печга ёқиш учун қоплаб таппи қилса, айримлар қишда қуруққина ёқамиз дея, ўтинхонани тўнгакларга тўлдиришади.

Мол-қўй боқувчи хонадондагилар эса оилавий қишлайдиган хонаси билан бир қаторда оғулхонани ҳам мавсумга мос таъмирлайди.

Печга ёқиш учун тайёрланган таппилар.

Ўғулхонадаги ўтин ва пичан.

Хонадоннинг қиш учун кўмир захираси.

Игнадек тешикдан туядек совуқ киради, дея кўп оилалар уйдаги барча деразаларга плёнка қоқиб чиқса, айримлар дераза ойналарига дастурхон, юпқароқ кўрпача тўсишади.

Печга ёқиш учун уйга ўтин олиб кираётган онахон.

Кичик бўлишига қарамай, далада ўтин тўплаб, уйига кираётган болакай.

Ўтин арралаётган ёш бола.

«Қишки ошхона».

Совуқ бўлиши қарамай, ташқаридаги ўчоқда овқат тайёрлаётган она.

Қишлоқлардаги аксар хонадонларда печ билан бир қаторда сандалдан ҳам фойдаланилади. Қишлоқдаги қишнинг совуғи айниқса нуронийларни танчага чорлайди. Кексалар бор ҳар бир хонадонда сандалнинг то баҳоргача уй тўрида туриши анъанага айланиб улгурган.

Сандал атрофида овқатланаётган оила.

Сандал ичини янада иситиш учун чўғни аралаштираётган қиз.
Электр ўчгани сабабли қизалоқ шамдан фойдаланмоқда.

Қировда қолган поябзаллар ва ювилган кийимлар иссиқ печ ёнида қуритилади.

Электр ўчган вақт хонани ёритиш учун ёқилган шамлар.

Сандал атрофида тушлик қилаётган оила.

Баҳорга чиқиб молхонадаги ем-хашаклару, ўтинхонадаги қоп-қоп таппилар ва ғамланган кўмирнинг охири кўрина бошлайди.

Ер яшил тусга кириб, офтоб қиздира бошлаганида эса қишлоқлик отахон-у, онахонлар «Бу қишдан ҳам омон чиққанимизга шукур, омонлиқ-сомонлиқ» дея майсаларни юзларига суришади. Ва яна кўп ўтмай кейинги қишга тайёргарлик кўра бошлайдилар.

Печдаги ўтин-у таппилар ёниб бўлгандан сўнг ҳосил бўладиган кул.
Одатда қишлоқда кулни ерга ўғит бўлиши учун шудгорга сепишади.

Материал PressPhoto.Uz фотоагентлиги
билан ҳамкорликда тайёрланди

Суратлар муаллифи: Мадина Аъзам.
Фотоҳикоя муаллифлари ўзларининг ишларига ҳаволаларни photo@gazeta.uz электрон манзилига юборишлари мумкин. Хатга сюжетлар тавсифи, жойи, санаси, муаллифнинг тўлиқ исми ва боғланиш учун телефон рақамларини киритишни илтимос қиламиз.

Биз ўз манбаларимизда ишларни нотижорий асосда
эълон қилиш имкониятини кўриб чиқамиз.

Изоҳ

Қўшимча имкониятларга эга булиш учун сайтда рўйхатдан ўтинг