2021 йилнинг январь-ноябрь ойларида Ўзбекистонга қиймати 115,3 млн долларига тенг бўлган 308,4 млн литр автомобиль бензини импорт қилинган. Бу ҳақда Давлат статистика қўмитаси хабар берди.
Бензин импорти ўтган йилнинг мос даврига нисбатан 112 млн литрга ёки 36,3 фоизга ошган.
Ўзбекистонга бензиннинг асосий қисми Россия (145,3 млн литр) ва Туркманистон (141,2 млн литр) давлатларидан импорт қилинган. Шунингдек, Қозоғистон (16 млн литр), Ироқ (3,6 млн литр) ва Эрондан (1,8 млн литр) ҳам мамлакатга бензин олиб келинган.
2021 йилнинг 11 ойи давомида Ўзбекистонда 1 млн тоннадан зиёд бензин ишлаб чиқарилган.
2021 йилнинг сентябрь ойида «Газета.uz» Ўзбекистон тарихида илк бор Бухоро нефтни қайта ишлаш заводи томонидан АИ-98 маркали бензин ишлаб чиқарилгани ҳақида хабар берганди. 380 тонна ҳажмдаги бензиннинг физик-кимёвий хусусиятлари стандартга биноан муваффақиятли синовдан ўтказилган.
Давлат статистика қўмитасининг сентябрь ойи маълумотларига кўра, йил бошидан бери бензин нархи 28,2 фоизга, пропан эса — 27,3 фоизга ошган.
Эслатиб ўтамиз, бундан олдин Ўзбекистон 9 ойда 289 млн литр автомобиль бензини импорт қилгани ҳақида хабар берилганди.
