«Uzbekistan Airways» компанияси 6 январь куни Олмаота ва Актобега учиши режалаштирилган парвозлар бекор қилинганини маълум қилди.
Маълумотга кўра, HY9729/9730 Нукус-Актобе-Нукус ва HY763/764 Тошкент-Олмаота-Тошкент йўналишлари бўйича авиақатновлар Қозоғистондаги аэропортларнинг техник сабабларига кўра бекор қилинган.
Ушбу йўналиш бўйича парвозларни амалга ошириш кунлари ҳақидаги маълумот қўшимча эълон қилинади.
Йўловчилар бекор қилинган парвозлар авиачипталарининг тўлиқ қийматини чипта сотиб олинган жойда қайтариб олишлари ёки бошқа санага бепул қайта бронлашлари мумкин.
Олдинроқ, Қозоғистоннинг Оқтов шаҳридаги аэропорт ёпилганлиги сабабли Урганчдан ушбу шаҳарга парвозлар бекор қилинган эди.
Қозоғистонда 2 январь куни бошланган намойишлар 5 январь куни тартибсизликларга айланиб кетди. ОАВ Олмаота аэропортининг намойишчилар томонидан эгаллаб олинганлигини ва бутун мамлакат ҳудудида фавқулодда ҳолат ўрнатилганлиги ҳақида хабар бермоқда.
