Қозоғистоннинг Жанаозен шаҳрида автомобиль эгалари суюлтирилган газ нархи 120 тенгега (қарийб 3 минг сўм) кўтарилганидан норози бўлиб, оммавий митингга чиқди, деб хабар берди Tengrinews.kz.

Намойишчиларнинг бир қисми йўлга чиқиб, автомобиллар ҳаракатини тўсиб қўйишди.

Мангистау вилояти ҳокимлигининг Ички сиёсат бошқармаси вазиятга изоҳ берди.

«Соат 11.00да автомобиль эгалари Жанаозендаги ФҲДЁ биноси ёнида тўпланиб, суюлтирилган газ нархини пасайтириш масаласини муҳокама қилишди. Йиғилганларга суюлтирилган газни сотиш бўйича ишларнинг аҳволи ва «Тинч йиғинлар ташкил этиш тўғрисида»ги қонун, хусусан, уларнинг хатти-ҳаракатлари қонунга хилоф экани, йиғилиш ўтказилишидан 5 иш куни олдин ҳокимликни хабардор қилиш зарурлиги тушунтирилди», — дея хабар қилди бошқарма.

Шаҳар ҳокимлиги вакиллари йиғилганларни ўз талабларини ёзма равишда баён этишга таклиф қилди.

Мангистау вилояти Энергетика ва уй-жой коммунал хўжалиги бошқармаси бошлиғи Бердибек Картбаев газ нархининг ошишига изоҳ берар экан, республикада газнинг ўртача нархи литри учун 110 тенге, қўшни Атирау вилоятида — 115 тенге ёки Уралскда — 120 тенгени ташкил этишини маълум қилди.

«Айни пайтда вилоятда охирги истеъмолчи учун газ нархи 95−115 тенге атрофида. Аввалги 60 тенгелик нарх қайтмайди, чунки энди газнинг биржадаги нархи транспорт ва тадбиркорнинг операцион харажатларини ҳисобга олмаганда литри 70−85 тенгени ташкил этади», — дея тушунтирди у.

Кейинроқ Мангистау вилояти маркази Актау шаҳрида ҳам норозилик намойишлари бошланди. Асосан автомобиль эгалари ўз норозилигини кўрсатади. 3 январь оқшомида бир неча юз кишидан иборат бўлган намойишчилар Ақтаудаги «Ынтымак» майдонида иситиш учун ўтов ўрнатиб, тарқалишмади.

Қозоғистон президенти Қосим-Жомарт Тоқаев ўзининг Twitter-саҳифасида вазиятга икки марта муносабат билдирди.

«Ҳукуматга Жанаозендаги вазиятни иқтисодий мақсадга мувофиқлигини ҳисобга олган ҳолда зудлик билан ҳуқуқий жиҳатдан кўриб чиқишни топширдим», — деди у 3 январь кунги твитида.

Давлат раҳбари: «Намойишчилар жамоат тартибини бузмаслиги керак. Фуқаролар маҳаллий ва марказий ҳокимият органларига ўз талабларини ошкора билдириш ҳуқуқига эга, аммо бу қонунга, хусусан, тинч йиғилишлар тўғрисидаги қонунга мувофиқ амалга оширилиши керак», — дея таъкидлади.

Ҳукумат президентнинг баёнотидан сўнг газ нархи 85−90 тенгегача пасайганини маълум қилди.

Qazaq Oil ёқилғи қуйиш шохобчаларининг йирик тармоғи суюлтирилган газга бўлган талаб кескин ошганига қарамай, корпоратив мижозлар олдидаги мажбуриятларини тўлиқ бажариш, газни купонлар ва ёнилғи карталари орқали «белгиланган нархда» сотиш мажбуриятини олишини маълум қилди. Шу билан бирга, компаниянинг қайд этишича, захиралар чекланганлиги сабабли жисмоний шахсларга ёқилғи етказиб беришда чекловлар жорий этилиши мумкин.

Компания маълумотларига кўра, Энергетика вазирлиги томонидан эълон қилинган 85−90 тенгелик нарх коридори доирасида 10−12 январдан кейин қўшимча ёқилғи етказиб бериш ва суюлтирилган газни чекловсиз етказиб бериш қайта тикланиши кутилмоқда.

4 январь куни эрталаб Қозоғистон президенти Twitter орқали яна вазиятга изоҳ берди.

«Ақтауда таркибига президент Администрацияси ходимлари ҳам киритилган ҳукумат комиссияси иш бошлади. Республика оператив штаби доимий асосда ишламоқда, — деб ёзди Қосим-Жомарт Тоқаев. — Комиссияга мамлакатимиздаги барқарорлик манфаатларидан келиб чиққан ҳолда юзага келган муаммонинг ўзаро мақбул ечимини топиш топширилди».

«Ҳуқуқни муҳофаза қилувчи органларга жамоат тартибини бузиш ҳолатларининг олдини олишни таъминлаш бўйича топшириқлар берилди. Намойишчилар масъулият ва мулоқотга тайёрлигини кўрсатиши керак», — дея таъкидлади Қозоғистон президенти.