Ўтган йилда Ўзбекистон аҳолисининг тегишли қатламини эмлаш учун 39 203 933 доза вакцина қўлланилди, дея хабар бермоқда ССВ.

Маълум қилинишича, 2021 йилда тўлиқ вакцина курсини олганлар 18 ёшдан катта эмланувчиларга нисбатан 63 фоиздан ёки 13,5 миллион нафардан ошган.

Тўлиқ эмланлганларнинг:

  • 852 574 нафари 65 ёшдан ошганлар;
  • 427 833 нафари тиббиёт ходимлари;
  • 431 274 нафари мактаб ўқитувчилари;
  • 167 064 нафари мактабгача таълим муассасалари ходимлари;
  • 828 103 нафари сурункали касаллиги бор фуқаролар.

Тўлиқ эмланганларнинг қолган қисми бошқа аҳоли вакиллари ҳиссасига тўғри келади.

Шунингдек, шу пайтгача эмланиши кўзда тутилган 18 ёшдан катта аҳолининг қарийб 88 фоизи коронавирусга қарши биринчи доза вакциналарини олди.

Бу — Ўзбекистоннинг 18,8 миллион нафардан ортиқ аҳолиси вакцина қабул қилган дегани.

Статистикага кўра, йил давомида:

  • 29,6 миллион дозадан ортиқ ZF-UZ-VAC2001 вакцинаси;
  • 1,9 миллион дозадан ортиқ AstraZeneca вакцинаси;
  • 2 миллион дозадан ортиқ Pfizer/BioNTech вакцинаси;
  • 3 миллион доза Moderna вакцинаси;
  • 912 минг дозадан ортиқ Sputnik V вакцинаси қўлланилди.

Маълумотларга кўра, коронавирусга қарши тўлиқ эмланган аҳолининг энг катта қисми Самарқанд вилоятида бўлиб, вилоятда 1 765 228 нафар фуқаро тўлиқ вакцина олган.

Коронавирусга қарши тўлиқ вакцина олганлар вилоятда эмланиши кўзда тутилган 18 ёшдан катта аҳолининг 74 фоиздан ортиғини ташкил қилади.