Бухоро вилоятида ОИТСга чалинганидан хабардор бўла туриб, касалликни 40 га яқин шахсга юқтирган аёл 6 йил 6 ойга озодликдан маҳрум этилди. Бу ҳақда вилоят ички ишлар бошқармаси хабар берди.
Бошқарма маълумотига кўра, «Соғлом ҳаёт» тезкор профилактик тадбирлари доирасида Бухоро вилояти ИИБ ходимлари томонидан 2017 йилда ОИТС касаллигини юқтириб олган, бетартиб ҳаёт кечириб, фохишалик билан шуғулланиб келаётган аёл аниқланган.
Аёл вилоят ОИТС га қарши курашиш марказида ОИВ юқтириб олганлар рўйхатида турувчи шахс бўлиб чиққан. 2017 йилда диспансер назоратига олинган аёл касалликни била туриб, уни ўзгаларга юқтирмаслиги ҳақида ҳам огоҳлантирилган. ИИБ ходимининг маълум қилишича, у шундай ҳолат такроран содир этилса, унга Жиноят кодексининг 113-моддаси (таносил ёки ОИВ касаллиги/ОИТСни тарқатиш) билан жавобгарликка тортилиши мумкинлиги айтилган ва тилхат ёздириб олинган бўлган.
«Моддий манфаат туфайли мижозларга интим хизмат кўрсатиб келиб, ўзидаги инфекцияни юқтирганликда гумонланиб, тегишли ҳужжатлар расмийлашитирилди ҳамда тергов органига юборилди», — дейди ИИБ ходими.
Репортажда айтилишича, ОИТС юқтирган аёл қарийб 4 йил давомида қасддан касалликни 40 нафарга яқин шахсга юқтирган. Жабрланувчиларнинг орасида оилалилар, хусусан, яқинда фарзанд кутаётганлар ҳам бўлган. Касаллик уларнинг хотинига ҳам юққан бўлиши мумкинлиги айтилмоқда.
«Март-апрель ойларида дўстларим билан кафеда овқатланиб ўтирганимизда, ёнимиздаги столда овқатланиб ўтирган 2 нафар қиз билан танишиб қолдик. Улар билан бориб, яқин алоқада бўлиб, шундан сўнг, бир неча маротаба телефонлашиб, дўстларим билан бориб яқин алоқада бўлганимиздан кейин мен у қизларнинг касалликка чалинганини эшитиб қолиб, тиббий кўрикдан ўтганимда, ўзимга ушбу касалликни (ОИТС — таҳр.) юқтириб олганимни билиб қолдим. Турмуш ўртоғим ҳомиладор, ҳомила 6 ойлик.
Ҳозирда ўзимнинг касаллик юқтирганимдан хавтоирдаман. Қилган ишимдан пушаймонман. Сизларга ҳам кўчадаги ҳар хил аёллар билан жинсий алоқада бўлмаслигингизни, бу ёмон оқибатларга олиб келишини айтиб ўтмоқчиман. Мен ҳам, оилам ҳам туғулажак фарзандим ҳаёти хавф остида эканлигидан пушаймондаман", — дейди жабрланувчилардан бири.
Уларнинг яна бири эса дўсти орқали аёл билан танишиб қолганини, сўнг у билан жинсий алоқага киришганини айтган. Кейин қиз билан аввал унинг дўсти ҳам жинсий алоқада бўлганини, орадан анча вақт ўтиб эса унинг ОИТС га чалинганини билиб қолганини айтган. У ҳам ўзидан хавотирланиб, тиббий кўрикдан ўтганда, унда ҳам касаллик аниқланган. Жабрланувчининг 2 нафар боласи, турмуш ўртоғи бор. Оила аъзолари бундан ҳали хабардор эмас. «Касаллик ҳақида суриштиргандим, билсам, бу касалликнинг даъвоси йўқ экан. Ҳозирда ундан аъзият чекиб келмоқдаман», — деган у.
Ушбу аёл билан яқин алоқада бўлган яна бир шахс эса унинг кафеда дўстлари даврасида ўтирган пайтида келиб даврага қўшилганини, уни танимаслиги, мастлик туфайли унинг уйига бориб, эрталабгача кўнгилхушлик қилганини айтган.
Маълум бўлишича, у яқинда оила қуриши муносабати билан бўлажак турмуш ўртоғи билан тиббий кўрикка борган. Унда ҳам касаллик аниқлангани маълум бўлган. «Уни оила аъзоларга, яқинларга қай даражада тушунтиришни билмайман. Тушкун аҳволдаман», — деган жабрланувчи.
Бухоро вилояти ИИБ ҳузуридаги ТБ терговчисининг маълум қилишича аёлга ЖК нинг 113-моддаси 4-қисми (била туриб, бошқа шахсни ОИВ касаллиги/ОИТСни юқтириш хавфи остида қолдириш ёки унга ОИВ касаллиги/ОИТСни юқтириш) билан жиноят иши қўзғатилган. Жиноят иши айблов хулосаси билан суд муҳокамасига юборилган. Суд ҳукмига кўра, унга 6 йил 6 ойга озодликдан маҳрум қилиш жазоси тайинланган.
