Ягона республика процессинг маркази (Uzcard) 2022 йил январь ойи охиригача банкоматларида 50 ва 100 долларлик банкнотларни қабул қилиш функциясини тиклашни режалаштирмоқда. Бу ҳақда «Газета.uz»нинг сўровига компания ва Марказий банк матбуот хизмати жавоб берди.
Сентябрь охирида баъзи банклар компанияга банкоматлар тармоғида 100 ва 50 долларлик сохта пулларни қайта ишлашнинг алоҳида ҳолатлари ҳақида ҳабар бергани сабабли валюта банкоматларида айирбошлаш функциясини тўхтатган эди.
Ягона республика процессинг маркази аниқланган муаммолардан сўнг «тегишли банкомат дастурий таъминотини янгилаш учун сотувчилар билан ўзаро ҳамкорлик жараёнини ва тақдим этилган намуналарни синовдан ўтказишни бошлаган».
«Компания 2022 йил январь ойи охирига қадар ишларни тўлиқ якунлаш ва банкнотларни қабул қилиш функциясини қайта тиклашни режалаштирмоқда», — дейилади компания хабарида.
Компания, шунингдек, қалбаки пуллар қандай аниқланганини ҳам маълум қилди.
«Банкоматларда қабул қилинган ва чиқарилган пул учун бўлимлар бир-биридан мустақил бўлиб, мижозлар томонидан қўйилган банкноталар инкассацияга қадар банкоматда қолади. Кейин улар банкка боради, у ерда қалбаки банкнотлар аниқланади. Шунинг учун бу масала бутунлай банкларнинг ваколатига киради. Биз фақат алоҳида ҳолатлар бўйича сўровлар олдик, аммо бу хизматни тўхтатиб туриш ва муаммони ҳал қилишни бошлаш учун етарли эди», — дея қайд этди Ягона республика процессинг маркази.
Uzcard банкоматлар учун дастурий таъминот сотувчилари «Ускунанинг қўшимча хавфсизлигини таъминлаш учун барча керакли ўзгартиришлар киритилди», — дея таъкидлади.
1 сентябрь ҳолатига кўра, Ўзбекистонда 12 814 та банкомат ва ўз-ўзига хизмат кўрсатиш инфокиосклари ўрнатилган.
Эслатиб ўтамиз, аввалроқ хусусий секторга валюта айирбошлаш хизматларини кўрсатишга рухсат берилиши мумкинлиги ҳақида хабар берилганди.
