Қозоғистон йўлида ўзбекистонликлар тўла автобус аварияга учради. Бу ҳақда Zakon.kz хабар берди.
Хабарга кўра, 27 декабрь куни соат 21:40лар атрофида Олмаота вилоятидаги Олмаота-Бишкек трассасининг 108 км да ичида Ўзбекистон фуқаролари бўлган автобус Mercedes-Benz E-Class русумли енгил автомашина билан тўқнашиб кетиб, енгил машинанинг устига ағдарилган. Маълумотга кўра, ЙТҲга йўллардаги яхмалак сабаб бўлган бўлиши мумкин.
Фото: Zakon.kz
Олмаота вилояти Полиция департаментининг нашрга маълум қилишича, Mercedes-Benz ҳайдовчиси руль бошқарувини йўқотиб, қарама-қарши томондаги йўлга чиқиб кетган. Натижада, Van Hool автобуси билан тўқнашган.
Тўқнашув натижасида Mercedes-Benz E-Class автомашинасидаги 6 нафар йўловчидан 3 нафари воқеа жойида вафот этган, 3 нафари жароҳатланган. Кейинроқ маълум бўлишича, вафот этган кишиларнинг бири ҳайдовчининг рафиқаси, қолган иккитаси йўловчилар бўлган. Жароҳатланганлар орасида иккита ҳайдовчи ҳам бор. Лекин автобус ҳайдовчиси жиддий азият чекмаган ва кўрсатилган тиббий ёрдамдан сўнг уйига кетган. Қолган икки нафар жароҳатланганларнинг аҳволи оғир.
Ҳозирги пайтда воқеа бўйича суруштурув олиб борилмоқда. Автобусда бўлган йўловчиларга жиддий шикаст етмаган ва ЙТҲдан сўнг улар кўчада аланга ёқиб исинишган. Кейинчалик уларни бошқа автобус келиб олиб кетган.
Фото: Zakon.kz
Воқеа бўйича судга қадар текширув ишлари бошланган.
