Сирдарё вилояти Ховос туманида аҳолини ичимлик суви билан таъминлаш лойиҳасини амалга ошириш жараёнида 7 млн доллардан ортиқ маблағ талон-торож қилинган. Бу ҳақда вилоят ҳокими Ғофур Мирзаев 20 декабрь куни вилоят аҳолисига мурожаатида маълум қилди.

«126 минг аҳолини сув билан таъминлаш масаласида Ховос туманида Осиё тараққиёт банкидан олинаётган маблағларнинг талон-торож қилинганлиги, буни депутатлар, сиз яхши биласиз, сенаторлар билан учрашувда ҳам бир неча бор муҳокама қилинди. 7 миллион доллардан ортиқ маблағ. Чунки у ерда сифатсиз, бизнинг шўр шароитимизга, тупроқ шароитимизга тўғри келмайдиган сифатсиз қувурлар олиб келиб ўрнатишган», — деди у.

Унинг сўзларига кўра, лойиҳаларни амалга ошириш учун Озарбайжондан қурувчилар танланган.

«Ҳозир буни яна қилишимиз керак, чунки 126 минг аҳолини сув билан таъминлашимиз керак. 126 минг аҳолининг нима айби бор? Биз ҳозир республика раҳбариятига бу масалани жўнатдик», — деди ҳоким.

Ғофур Мирзаев Сардоба сув омборида юзага келган сув тошқини оқибатлари ҳалигача бартараф этилаётган Сардоба туманида қувурларни алмаштириш ишлари бўйича мисол келтирди.

«Сардоба туманида стеклопакет [стеклопластика бўлиши керак — таҳририят] қувурларини ётқизиш ишлари натижа бермади. Яқиндагина 7 километрлик сув қувурларини бошқа қувурларга алмаштирдик», — дея таъкидлади у.

Эслатиб ўтамиз, апрель ойида Тошкент вилоятидаги 3 та шаҳар ва 3 та туман аҳолисини тоза ичимлик суви билан таъминлаш учун ажратилган 500 млн сўмга яқин пул маблағлари талон-торож қилингани аниқлангани ҳақида хабар берилганди.