17 декабрь куни Бишкекда Қирғизистон футболининг 100 йиллигига бағишланган футзал бўйича ўртоқлик турнири бўлиб ўтди. Турнирда давлат раҳбари Садир Жапаров Президент администрацияси жамоаси сафида иштирок этди. Бу ҳақда Sport АКИpress нашри хабар берди.

Садир Жапаров дастлабки икки ўйинда 5 та гол урди ва икки ўйиндан кейин тўпурарга айланди. Учинчи ўрин учун баҳсда эса яна 4 та гол уриб, турнир тўпурари бўлди. Яна бир эсда қоларли воқеа — хонандалардан иборат жамоа дарвозабони президентнинг бошига зарба берди ва пенальти белгиганди. Президент пенальтини голга айлантирди.

Президент жамоасига ярим финалда омад кулиб боқмади — уларга қарши «Алга» профессионал жамоасининг 70 ёшли пенсионерлари тўп сурди. Улар бошқа жамоа футболчиларидан фарқли ўлароқ, турнирда яхшироқ ҳаракат қилди. Натижада улар президент жамоасини 4:2 ҳисобида мағлуб этди. Учинчи ўрин учун бўлиб ўтган баҳсда президент жамоаси «Бизнес» жамоаси устидан ғалаба қозонди.

Ўтган ой Туркманистонда президент Бердимуҳамедов футзал бўйича кўргазмали ўйинда иштирок этган эди. У ўйиннинг 90% вақтида тўпни назорат қилган ва кўплаб голлар киритган.

«Турнирдан кейинги хулоса қуйидагича — бу барча танқидчиларга Қирғизистон ҳали Туркманистон эмаслигини кўрсатиш учун ажойиб мисол бўлди», — дейилади хабарда.