17 декабрь кунидан бошлаб «Ўзбекнефтгаз»га қарашли автомобилларга ёқилғи қуйиш шохобчаларида «АИ-80» маркадаги бензин 6890 сўмдан арзонлаштирилиб, 1 литр ёқилғи 6500 сўм нархида сотувга чиқарилди.
Компания хабарида айтилишича, бунинг жамият раисининг топшириғига асосан, «Ишчи гуруҳ"лар тузилган ва нефт маҳсулотларининг истеъмолчиларга етказиб берилиши тўлиқ назоратга олинган.
Бензин тақчиллигини олдини олиш ва унинг нархларини арзонлаштириш борасида «Ўзбекнефтгаз», Монополияга қарши курашиш қўмитаси ва «Товар хомашё биржаси» ҳамкорлигида чора-тадбирлар ишлаб чиқилган.
Республика ҳудудидаги компанияга тегишли барча АЁҚШларда бензин арзонлаштирилган нархда сотилиши таъминлангани қўшимча қилинган.
Аввалроқ, Монополияга қарши курашиши қўмитаси бензин нархининг ошиш сабаблари ва нархни тушириш бўйича режалари ҳақида маълум қилганди.
Эслатиб ўтамиз, «Ўзбекнефтгаз» АЖга қарашли шохобчаларда 26 ноябрь куни соат 20:30дан бошлаб Аи-80 маркадаги бензиннинг 1 литри 6890 сўмдан сотувга чиқарилади. Қайд этилишича, республика ҳудудидаги «Ўзбекнефтгаз»нинг барча АЁҚШларда бензин бўлиши таъминланади.
Давлат статистика қўмитасининг сентябрь ойи маълумотларига кўра, йил бошидан бери бензин нархи 28,2 фоизга, пропан эса — 27,3 фоизга ошган.
Октябрь ойида Аи-91 нархи 9400 сўмга, Аи-92 — 9100 сўмгача, Аи-95 — 11200 сўмгача кўтарилган эди.
Ўзбекистонга ёқилғи асосан Россия (139 миллион литр), Туркманистон (121 миллион), Қозоғистон (16 миллион) ва Ироқдан (3,6 миллион) импорт қилинади.
