Европа Иттифоқи етакчилари Россияга қарши санкцияларни узайтиришга қарор қилди

Европа Иттифоқи (ЕИ) Россияга қарши иқтисодий санкцияларни яна олти ойга узайтиради. ЕИнинг 27 давлати президентлари ва ҳукумат раҳбарлари шундай қарор қабул қилган. Чекловлар 2014 йилда «Россиянинг Украинадаги вазиятни беқарорлаштирувчи ҳаракатларига» жавобан киритилган эди, шундан бери санкциялар мунтазам равишда узайтирилиб келинмоқда. Бу ҳақда ТАСС нашри хабар берди.

«Украинадаги вазиятни муҳокама қилиш контекстида етакчилар санкцияларни яна олти ойга, 31 июлга қадар узайтиришга келишиб олди», дейилади хабарда.

Охирги марта ЕИ Россияга қарши иқтисодий санкцияларни июль ойида узайтирган эди. Санкциялар Россиянинг айрим банклари ва компанияларининг ЕИнинг асосий ва иккиламчи капитал бозорларига киришини чеклайди, шунингдек, бир қатор бошқа чекловларни ҳам жорий қилади. Бундан ташқари, «Россия томонидан Қрим ва Севастопол ноқонуний аннекция қилингани учун» (2022 йилнинг июнигача узайтирилган), кимёвий қурол ишлатганлик учун (2022 йил октябргача), инсон ҳуқуқларини бузганлик учун (2022 йил декабригача) санкциялар ҳам мавжуд.


Япониядаги касалхонада чиққан ёнғинда 24 киши ҳалок бўлди

Япониянинг Осака шаҳрида содир бўлган ёнғин қурбонлари сони, сўнгги маълумотларга кўра, 24 кишига етди, деб ёзади РИА Новости.

Ёнғин Осака вокзали яқинида жойлашган саккиз қаватли терапия клиникасининг тўртинчи қаватида содир бўлган. Ёнғин 20 квадрат метрга яқин майдонга тарқалди. Полиция ёнғин қасддан уюштирилгани ҳақидаги тахминларни истисно қилмади.


Хитой АҚШни савдо қоидаларини бузганликда айблади

Хитой АҚШни мамлакатнинг саккизта технология компаниясига қарши санкциялар қўйгани учун танқид қилди. Пекин Вашингтон савдо қоидаларини очиқдан-очиқ бузди ва илм-фан ривожига тўсқинлик қилди, деб ҳисоблашини маълум қилган. Бу ҳақда Коммерсантъ нашри маълум қилди.

Хитойнинг АҚШдаги элчихонаси матбуот котиби Лю Пэнъюйнинг сўзларига кўра, Хитой АҚШни санкциялар қўллаш бўйича «нотўғри амалиётни зудлик билан тўхтатишга» чақирмоқда. Дипломатнинг таъкидлашича, Пекин Хитой корхоналари ва илмий-тадқиқот институтларининг ҳуқуқ ва манфаатларини ҳимоя қилиш чораларини кўришини қайд этди.

Вакилнинг сўзларига кўра, Қўшма Штатлар ўз ҳаракатлари билан «эркин савдо қоидаларини қўпол равишда бузмоқда, жаҳон саноат ва қиймат занжирлари хавфсизлигига жиддий таҳдид солади». Бундан ташқари, Вашингтон илм-фан ва технология ривожига ҳам тўсқинлик қилмоқда, шунингдек, «барча мамлакатлардаги одамларнинг фаровонлиги ва манфаатларига жиддий путур этказмоқда».


Жанубий Корея коронавирус туфайли чекловларни кучайтиради

Жанубий Кореяда охирги уч кундан бери кетма-кет 7 мингдан ортиқ янги COVID-19 ҳолатлари аниқланди. Шу сабабли 18 декабрдан бошлаб мамлакатда коронавирус тарқалишининг олдини олиш учун чекловларни кучайтирилади. Бу ҳақда РИА Новости хабар берди.

Хусусан, касалликларни назорат қилиш бошқармаси маълумотларига кўра, пандемия бошланганидан бери касалланганлар сони 551,5 минг нафарни ташкил қилди.
Бир кун аввал 7,6 мингта, чоршанба куни эса 7,8 мингта янги коронавирус ҳолати аниқланган. 971 киши оғир касаллар қаторига киритилган. 73 киши вафот этган ва пандемия даврида жами ўлганлар сони 4591 кишига етган.

Маълумотларга кўра, Жанубий Кореяда COVID-19'дан ўлим даражаси 0,83% даражасида қолмоқда. Жанубий Кореяда 38 мингга яқин одам ҳозир уйда касал ҳолда эканлиги айтилди. 52 миллион аҳолига эга мамлакат аҳолисининг 81,7 фоизи коронавирусга қарши тўлиқ эмланган.