Беларусь суди мухолифатчи Светлана Тихановскаянинг турмуш ўртоғига 18 йил қамоқ жазоси белгилади
Гомел вилоят суди судьяси суд мажлисида Светлана Тихановскаянинг турмуш ўртоғи Сергей Тихановскийни бир қанча жиноий айбловлар, жумладан, оммавий тартибсизликлар уюштиришда айбдор деб топди, дея хабар берди РИА Новости.
«Сергейга 18 йил қамоқ жазоси юқори даражадаги хавфсизлик режимида белгиланди», — деди маҳкумнинг адвокати Виктор Матскевич.
Матскевичнинг айтишича, ҳимоячи белгиланган муддатда апелляция беради.
Францияда коронавируснинг омикрон штамми билан касалланганлар сони 130 нафардан ошди
Франция ҳукумати вакили Габриел Атталнинг маълум қилишича, Францияда 130 дан ортиқ кишида омикрон коронавирус штамми аниқланган. Бу ҳақда РИА Новости маълум қилди.
Унинг таъкидлашича, бир ҳафта ичида коронавирус учун 10 мингта тест ўтказилган.
«Дунё бўйлаб омикрон штамми ҳақида жуда жиддий хавотир бор, бу, эҳтимол, дельта вариантидан ҳам юқумли бўлиши мумкин», — деди Франция вазирлар маҳкамаси вакили.
Москвада охирги 32 йилликдаги энг кучли қор ёғди
Москвадаги Халқ хўжалиги ютуқлари кўргазмаси комплексидаги базавий метеорология станциясида 9 мм, Балчугда 11 мм ва Тушинода 10 мм ёғингарчилик аниқланган. Бу ҳақида Коммерсантъ нашри хабар берди.
«1989 йилдан бери ушбу метеорология станциясида 13 декабрь куни ёққандек кучли қор ёғиши кузатилмаган эди, 32 йил олдин шу куни метеорологлар 9,9 мм қайд этган», — дейилади хабарда.
Маълум қилинишича, энг кўп қор ёғиши Янги Москва (Михайловское) ва Долгопруднийда кузатилган — 12 мм. Одатда декабрь ойи учун ёғингарчилик меёри — 56 мм.
Маълумотларга кўра, Москва аэропортларида 36 та рейс кечиктирилган ёки бекор қилинган. Шереметьевода 16 та рейс бекор қилинган, бештаси кечиктирилган. Домодедовога 11 рейс, Внуковога 4 та рейс кечиктирилган.
Жанубий Суданда 89 киши номаълум касалликдан вафот этди
Жанубий Судан шарқида (Шимоли-Шарқий Африка) камида 89 киши номаълум касалликдан вафот этди. Бу ҳақда BBC Жаҳон соғлиқни сақлаш ташкилоти (ЖССТ) баёнотига таяниб хабар берди. Касалликнинг эпицентри Жонглей провинциясидаги Фангак шаҳри бўлган. Ҳодисани ўрганиш учун у ерга мутахассислардан иборат тезкор гуруҳ юборилган.
«Биз хавфни баҳолаш ва суриштирув ўтказиш учун тезкор гуруҳни юборишга қарор қилдик. Айнан ўша пайтда улар касал одамлардан намуналар олишлари мумкин бўлади, аммо биз олган дастлабки маълумотларга кўра, 89 киши вафот этган», — деди ЖССТ вакили.
