Хитойнинг Anhui Zhifei Longcom Biopharmaceutical биофармацевтика компанияси уларнинг коронавирусга қарши вакцинаси омикрон штаммидан ҳимоя қила олишини маълум қилди. Бу ҳақда РИА Новости хабар берди.
«Халқаро кўп марказли клиник синовнинг учинчи босқичи натижалари рекомбинант вакцинанинг ҳар қандай даражадаги COVID-19'га қарши ҳимоя қилиш самарадорлиги 81,43 фоизни ташкил этишини кўрсатди», — дейилади хабарда.
Компаниянинг қўшимча қилишича, сўнгги тадқиқотга кўра, «рекомбинант вакцина омикрон штаммидан ҳам яхши ҳимоя қилади».
Тадқиқот шуни кўрсатдики, вакцина коронавирусдан ўлим эҳтимолини 100 фоизга ва дельта штаммидан 80 фоиздан ортиқроқ даражада ҳимоя қилади.
Вакцина Anhui Zhifei Longcom Biopharmaceutical компанияси ва Хитой фанлар академияси Микробиология институти томонидан ишлаб чиқилган. 2020 йил 19 июнь куни вакцина клиник синовлар учун мамлакат расмийларидан рухсат олган. Биринчи босқич — 22 июнь куни, иккинчи босқич эса — 10 июлда бошланган. Клиник синовларнинг учинчи босқичи ўша йилниг 18 ноябрь куни Хунань провинцияси Сянтань шаҳар округида, 10 декабрь — Тошкент шаҳрида бошланган.
Аввалроқ, «Газета.uz» Pfizer-BioNTech компанияси коронавируснинг Omicron штаммидан ҳимоя қила оладиган учинчи доза устида ишлаётгани ҳақида хабар берганди. Ушбу доза билан эмлаш антитаначалар ҳимоясини дастлабки икки дозага нисбатан 25 бараварга оширади. Pfizer мутасадди ташкилотлар рухсат бергач, 2022 йилдан Omicron`га қарши 4 млрд бустер доза ишлаб чиқаришни режа қилган.
Эслатиб ўтамиз, бундан олдин ЖССТ Жанубий Африкада аниқланган коронавируснинг B.1.1.529 штаммини «хавотирли вариант» деб таснифлаган эди. Ташкилот унга Омикрон деб ном бериб, уни вируснинг бошқа шаклларига қараганда тезроқ тарқалиши мумкинлигини қайд этганди.
