13 декабрь куни Давлат активларини бошқариш агентлиги томонидан Тошкент шаҳри Чилонзор туманида жойлашган 27,9 гектар ер майдони ҳамда 29 851 кв.метр бино-иншоотларга эга ҳарбий шаҳарчаонлайн аукционга қўйилди.

Таъкидланишича, ушбу давлат мулки савдосида 3 нафар иштирокчи ўртасида қизғин баҳс кечган. Бошланғич нархи 204 млрд сўм бўлган мулкнинг нархи 1 соат 23 дақиқа давом этган аукцион якунида нарх 15 қадам оширилган ва мулк 266,4 млрд сўмга сотилган.

Савдода «Do'mbrobod City Group» МЧЖ ғолиб деб топилган, Корхона ва ташкилотларнинг ягона давлат реестрига мувофиқ, ушбу корхона шу йилнинг 2 декабрида ташкил этилган. Резерв ғолиб сифатида эса 262,3 млрд сўм таклиф қилган «Build power» МЧЖ танланган.

Эслатиб ўтамиз, июль ойида Ўзбекистонда шу йилнинг биринчи ярмида 478 та давлат мулки 1,1 трлн сўмга сотилгани ҳақида хабар берилганди. Ушбу ойда Президент видеоселекторда сотилиши белгиланган 288 та мулк савдоларга чиқарилмаганини танқид қилганди. Қолаверса, давлат корхоналари ва банклари ихтиёридаги уларнинг фаолиятига хос бўлмаган 511 та объект ҳалигача сотилмасдан тургани айтилган. Юқоридагилардан келиб чиқиб, 2021 йилда 900 дан ортиқ давлат мулки сотувга қўйилиши таъкидланганди.