Бош прокуратура бошқарма бошлиғининг ўринбосари лавозимида ишлаган Ш. В. фуқародан пора олганликда гумон қилинмоқда. Бу Бош прокуратуранинг Шахсий хавфсизлик бошқармаси томонидан ўтказилган тадбирда аниқланди.

У қариндоши Ш. Н. орқали унинг таниши А.К. нинг ишончига кириб, унга нисбатан Бухоро вилояти прокуратураси иш юритувидаги жиноят ишини танишлари орқали тугатиб беришни ваъда қилган. 27 ноябрь куни фуқаро А.К.дан 3.000 АҚШ долларини қўлга киритганлиги айтилмоқда.

Мазкур ҳолат юзасидан Бош прокуратура томонидан 7 декабрь куни Ш. В. га нисбатан Жиноят кодексининг 168-моддаси 3-қисми «а» банди (Фирибгарлик), 28, 211-моддаси 1-қисми (Пора бериш) билан жиноят иши қўзғатилган.

Шунингдек, унинг қариндоши Ш. Н.га Жиноят кодексининг 212-моддаси 1-қисми (Пора олиш-беришда воситачилик қилиш) билан жиноят иши очилган.

Гумонланувчи Ш. В. процессуал тартибда ушланди. Бош прокуратура тизимда коррупцияга қарши курашиш бўйича ишлар давом этаётганини қўшимча қилган.

Аввалроқ, Бош прокуратуранинг яна бир бошқарма бошлиғи ўринбосари 29 минг доллар миқдорида пора олган вақтида ушланган эди. Гумондор ушбу пулларни 2020 йили Олмалиқ прокурори сифатида ишлаган вақтидан бери танишининг тендерда ютишига ёрдам берганини айтиб, талаб қилиб келган.