Россия ҳуқуқни муҳофаза қилиш органлари ўзбекистонлик 28 ёшли ММА жангчиси Бунёд Тўхтаевни қидирмоқда. Бу ҳақда Spbdnevnik хабар қилди.

ОАВнинг маълум қилишича, 8 декабрь куни Петербургнинг Якорний кўчасида «Э» тезкор марказининг икки ходими спортчини қўлга олади.

Ҳуқуқни муҳофаза қилиш органлари ходимларида гумондорнинг QR-кодлар ва миграция ҳужжатлари савдосига алоқадорлиги юзасидан шубҳа қилишга асослар бўлган. Спортчи ва ходимлар автомобилга ўтирганида, у полициячини уриб, машина салонидан қочиб чиқади. Бироқ кўп ўтмасдан қўлга олинади.

«Муштумзўр 52-полиция бўлимига олиб келиниб, жиноят иши қўзғатиш учун далиллар тўпланди. Бироқ 9 декабрь куни кундузи 11 лар атрофида Тўхтаев полиция бўлимидан қочиб кетади. Тергов бўлимига олиб кетилишини кутмади. Тахминларга кўра, камерадан сездирмасдан чиқиб, кириш эшишига келади ва қочиб кетади», — дейилади хабарда.

Ҳозирда спортчи қидирилмоқда.

Эслатиб ўтамиз, аввалроқ ўзбек миллатига мансуб россиялик ММА жангчиси Акмал Хожиев АҚШда коронавирусга қарши эмлаш зарурати бўйича келишмовчиликлар туфайли шифокорни ўлдириб қўйган эди.