Болалигимдан, аниқроғи, 5-синфлигимдан суратга олишни бошлаганман. Одатда дўстларимни тўй лимузинлари олдида суратга олардим, кейин эса улардан мени расмга олиб қўйишларини илтимос қилардим. DSLR фотоаппаратини 2015 йилда иш бўйича баъзи предметларни суратга олиш учун харид қилганман. Материаллардан коллаж яратардим, кейин улар сайтга жойланарди. Шу орқали бу машғулотни севиб қолдим.

Айниқса, 1990 йилларга қадар ишлаб чиқарилган машиналарга қизиқаман. Ўша вақтларда «миллионник», яъни миллион километр масофани босиб ўтадиган машина каби тушунчалар урфга кирган эди.

Бундай машиналарни лойиҳалаштиришга кўп пул ва узоқ вақт сарфланарди. Заводдан мукаммал автомобиль чиқиши учун машинани сотувга чиқаришдан олдин у синовдан ўтказиларди, унда юриб кўриларди.

Ҳозир «миллионник» деган тушунча мавжудми? Бугунги кунда машиналар бир неча йилга сотиб олинишини кўряпман. Бир сўз билан айтганда, улар «беш йиллик машиналар». Уларни лойиҳалаштиришда сўнгги сўзни маркетологлар айтишади. Автомобиллар бир хил юрғизувчиларда, бир хил двигателларда яратилмоқда - харажатларни камайтириш ва харидорни бир-икки йил ичида қайтариш учун улар соддалаштирилмоқда, чунки «абадий» машина яратишдан наф йўқ.

Мен тараққиёт ёки технология ривожланишига қарши эмасман. Аммо «миллионник» - бу, одатда, кўплаб мутахассислар томонидан лойиҳалаштирилган машина ҳисобланади. Уни бошидан қулай, ишончли ва чиройли қилиб яратишган. Бундай машинанинг дизайни кўп йиллар давомида долзарб бўлиб қолаверади.

Бундай «абадий» машиналарнинг ҳар бир деталини таъмирлаш мумкин. Замонавий автомобилларнинг қисмлари одатда таъмирланмайди ва фақат алмаштирилиши керак бўлади. Бундан ташқари, биз катта ҳажмдаги алмаштиришга тобора яқинлашиб бормоқдамиз.

Менинг фотосуратларимда сиз мукаммал ёки деярли мукаммал ҳолатда сақланиб қолган машҳур автомобилларни топишингиз мумкин. Улар орасида маҳаллий ГАЗ-21 «Волга», ЗИМ ГАЗ-12, ГАЗ-14 «Чайка» ва хорижий Mercedes-Benz W116, W126, W124, BMW E38, Е36, E30 ва бошқалар бор.

Одамлар бу машиналарини жону-дилидан ортиқ кўришади. Булар менинг эътиборим ва ҳурматимга лойиқ автосаноатнинг дурдоналари.

Ушбу автомобилларни бундай ҳолатда сақлаш қийин ва анча харажат талаб қилади. Айнан шунинг учун уларнинг эгаларига алоҳида ҳурмат изҳор қилиш мумкин.

Болалигимда Икарус автобуслари ва РАФ маршруткаларида юрардим. Бу маршруткалардаги энг зўр жойлар орқа қаторлар эди, чунки у ерда дераза кенгроқ очиларди. Ушбу транспорт тўғрисидаги хотиралар мени Совет автомобиль саноатининг классикаларини суратга олишга ундади. Шунинг учун мен «Волга» ва «Жигули»ларни суратга олишни бошладим.

Мен юк ортилган машиналарни суратга олишни ҳам яхши кўраман. Менда фактурали, эпик ва кўтаринкиликка тўла устига гилам ортилган матизнинг сурати мавжуд.

«Волга» жуда чидамли машина қилиб яратилган. Шунинг учун бу машинадан ҳатто юк ортиш учун ҳам фойдаланилади. Замонавий машинага бундай оғирликдаги юк ортилса у гугурт чўпи каби синиб кетади.

Автомобилда одамларга хос комплекслар мавжуд эмас, шунинг учун ҳам уни суратга олиш осон. Машинанинг атрофидаги муҳит қизиқ бўлмаса, уни истага жойингизга кўчиришингиз ҳам мумкин. Мен бу машиналарни суратга олиш учун пул олмайман. Чиройли машинани суратга олишнинг ўзи мен учун энг яхши мукофотдир.

Баъзида автомобиль эгалари менинг меъзонларимга тўғри келмайдиган машиналарни суратга олишимни сўрашади. Масалан, UzAuto автомобилларини. Бундай ҳолларда мен қизиқарли манзилни топишни сўрайман, шунда сурат манзара ҳисобига қизиқроқ ва кўркамроқ чиқади.

Мен нафақат автомобилларни, балки тарихни – яқин келажакда йўқолиб кетадиган нарсаларни суратга олишни яхши кўраман. Мен ўзимни фотография соҳасида чегаралаб қўйишни ёқтирмайман, шунинг учун менинг суратларимда одамларни ҳам, архитектурани ҳам, тасодифий воқеаларни ҳам кўриш мумкин.

Кўча фотосуратлари жанрига секин-аста киришиб кетдим. У менга овни эслатади, бу овда ўлжа – такрорлаб бўлмайдиган ноёб кадр.

Фотография соҳасидаги ривожланишимни ишларимнинг National Geographic, LensWork, Eyemazing каби йирик журналлар муқовасида чоп этилишида кўряпман.