Россияга Африка давлатлари ва Гонгконгдан келган фуқаролар 14 кунлик карантинга олинади

«Роспотребнадзор» раҳбари Анна Попова Россияга Африканинг тўққиз давлати ва Гонконгдан келган ҳар бир киши учун икки ҳафталик мажбурий карантин жорий қилинишини маълум қилди, дея хабар берди РИА Новости.

Рўйхатга Ботсвана, Зимбабве, Лесото, Мадагаскар, Мозамбик, Намибия, Танзания, Эсватини, Жанубий Африка ва Гонконг киритилган. Ушбу мамлакатлардан келган ҳар бир киши 14 кун давомида изоляция қилиниши ва икки марта коронавирус учун ПЦР-тестларидан ўтиши керак.


Жанубий Кореяда коронавируснинг омикрон штамига чалинганлар сони 36 нафарга етди

Корея Касалликларни назорат қилиш ва олдини олиш агентлиги (KDCA) маълумотларига кўра, Жанубий Кореяда омирон штаммининг тасдиқланган ҳолатлари сони 36 тага етди.

KDCA маълумотларига кўра, 12 та янги ҳолатдан учтаси чет элдан келган фуқароларда, тўққизта инфекция эса вируснинг мамлакат ичида юқиши натижасида юзага келган. Ҳозирда яна етти киши тестдан ўтказилмоқда.


Бурундида қамоқхонада юзага келган ёнғинда 40 га яқин одам ҳалок бўлди

Бурунди пойтахти Гитега шаҳридаги қамоқхонада содир бўлган ёнғинда 38 киши вафот этди, 69 киши оғир яраланди. Бу ҳақда РИА Новости хабар берди.

Қайд этилишича, камида минг нафар маҳбус сақланаётган қамоқхонада ёнғин эрталаб соат 4 да келиб чиққан. Қизил Хоч ходимлари ва ўт ўчирувчилар зудлик билан воқеа жойига етиб келишган, бироқ бинони тезда тарк этишган.


Беларусда пиротехника воситалари сотилишига рухсат берилди

Беларус ҳукумати 2020 йил август ойида президентлик сайловларидан кейинги норозилик намойишлари фонида киритилган пиротехника маҳсулотларининг улгуржи ва чакана савдосига қўйилган тақиқни бекор қилди.

Беларус Республикаси Вазирлар Кенгашининг 2020 йил 11 августдаги 475-сонли «Пиротехника маҳсулотларининг муомаласи тўғрисида»ги қарори ўз кучини йўқотган деб топилсин», дейилади ҳукумат фармойишида.


Cуданда номаълум қуролли шахслар ҳужуми оқибатида 48 киши ҳалок бўлди

Суданнинг Ғарбий Дарфур штатининг Жебел-Мун ҳудудида номаълум қуролли шахслар томонидан уюштирилган ҳужумда камида 48 киши ҳалок бўлди. Бу ҳақда ТАСС хабар берди.

Гувоҳларнинг айтишича, қуролланган одамлар Кереинек шаҳрини ўраб олиб, уни оғир қуроллардан ўққа тута бошлаган, сўнгра қочқинлар лагерини ёқиб юборган. Судан Шифокорлар марказий қўмитаси ҳужум натижасида 48 кишининг жасади ва яна кўп ярадорлар топилганини айтди.

Охирги бир ой ичида Жебел-Мун ҳудуди жами 100 га яқин кишининг ўлимига сабаб бўлган қуролли тўқнашувлар марказига айланди.


АҚШ инсон ҳуқуқлари бузилгани учун Пекин Олимпиадасига дипломатик бойкот эълон қилди

АҚШ ҳукумати 2022 йилги Пекин Олимпиадасини дипломатик бойкот эълон қилишга қарор қилди. Расмий амалдорлар ўйинларга бормайди, деди Оқ уй матбуот котиби Жен Псаки.

ХХРнинг Шинжондаги геноцидни ва бошқа инсон ҳуқуқлари бузилишини инобатга олган ҳолда, Байден маъмурияти Пекинда 2022 йилги қишки Олимпия ва Паралимпия ўйинларига дипломатик ёки расмий делегация юбормайди.

Бу қарор спортчиларга таъсир қилмайди — АҚШ терма жамоаси ҳали ҳам Олимпиадада қатнашиши мумкин. Халқаро олимпия қўмитаси (ХОҚ) АҚШ расмийларининг қарорини ҳурмат қилишини маълум қилди: «Шу билан бирга, ушбу баёнот Олимпиада ва спортчиларнинг иштироки сиёсатдан ташқарида эканлигини кўрсатади ва биз буни олқишлаймиз «.