«Барселона» клуби собиқ ўйинчиси, айни вақтда «ПСЖ» ва Аргентина терма жамоаси ҳужумчиси Лионел Месси «Олтин тўп — 2021»ни қўлга киритди, деб хабар берди Sports.ru нашри.

34 ёшли аргентиналик футболчи ушбу совринни еттинчи марта қўлга киритди. Олтин тўпни қўлга киритганлар орасида иккинчи ўрин Криштиану Роналдуга — 5 та соврин билан насиб этган.

2021 йилда Лионел Месси «Барселона» билан Испания кубогини қўлга киритди ва 2020/21 йилги мавсумни 30 та гол билан Ла Лиганинг энг яхши тўпурари сифатида якунлади. Эътиборлиси, у билан Аргентина терма жамоаси илк бор Америка Кубоги соҳибига айланган.

Бунга қадар Месси кетма-кет 4 маротаба — 2009 йилдан 2012 йилга қадар, қолаверса, 2015 ва 2019 йилларда «Олтин тўп»ни қўлга киритганди. Коронавирус пандемияси сабаб ўтган йили мукофотни топширмасликка қарор қилинган эди.

Нашрнинг ёзишича, «Олтин тўп» учун курашган «Бавария» ва Польша терма жамоаси ҳужумчиси Роберт Левандовски France Football журналининг биринчи маротаба топширилаётган янги соврини — йилнинг энг яхши ҳужумчиси соҳибига айланди.