Октябрь ойида Ўзбекистонга хориждан 55 та электромобиль импорт қилинган. Бу ҳақда Давлат статистика қўмитаси хабар берди.
Ушбу кўрсаткич сентябрь ойига нисбатан 2 тага кам. Ўзбекистон октябрь ойидаги электромобиллар хариди учун 1,5 млн доллар сарфлаган.
Апрель ойида «Газета.uz» Фарғонада йил охиригача электромобилларни йиғиш йўлга қўйилиши кутилаётгани ҳақида ёзган эди. 520 млрд сўмлик қийматга эга инвестицион лойиҳа президент иштирокидаги йиғилишда тақдим этилганди. Мазкур лойиҳанинг умумий қиймати 520 млрд сўм бўлиб, объектнинг ишга туширилиш вақти 2021 йилнинг ноябрь ойига белгиланганлиги айтилган эди.
Март ойида Молия вазирлиги мамлакат ичида электромобил харид қилиш ва уларни вақтинча олиб кириш учун тўловларни бекор қилиш бўйича таклиф киритган эди. 2020 йилда Ўзбекистон 2,9 млн доллар қийматга эга 131 та электромобиль импорт қилган.
«Ўзавтосаноат» компанияси Ўзбекистонда электромобиллар ишлаб чиқарилиши 2025 йилда бошланиши ҳақида маълум қилган эди.
Фарғона вилоятида декабрь ойида «Central Asia Motors» корхонасида 4 та енгил ва 8 та юк электромобиллари тест режимида ишлаб чиқарилади. Корхона тўла қуввати билан ишга тушгач, йилига 10 минг электромобиль ишлаб чиқариши кутилмоқда. Ишлаб чиқарилган маҳсулотнинг 40 фоизи экспорт қилинади.
Октябрь ойи охирида январь-сентябрь ойларида Ўзбекистонга 558 та электромобиль импорт қилиниб, импорт ҳажми қарийб 7 бараварга ошгани ҳақида хабар берилган эди. Улар асосан Хитойдан олиб келинаётганлиги айтилган.
Аввалроқ Ўзбекистонда электромобиллар учун алоҳида — янги намунадаги давлат рақами белгилари ишлаб чиқарилгани ҳақида хабар қилинди. 1 ноябрга қадар электромобиллар учун расмийлаштирилган давлат рақами белгилари бепул алмаштириб берилиши айтилган.
