Энергетика вазирлиги штаби томонидан жорий йилнинг 17 ноябрь куни Тошкент вилоятининг Чирчиқ шаҳрида жойлашган SHIRINA PETROL ва Тошкент туманида жойлашган CLEAN GAS SERVICE МЧЖларига қарашли автомобилларга газ тўлдириш компрессор шохобчаларида текширув ўтказилди, дея хабар берди вазирлик матбуот хизмати.
Текширув натижасида ушбу 2 та тадбиркорнинг 1,635 млн куб метр табиий газдан ноқонуний фойдалангани аниқланган. Ушбу миқдордаги газ бугунги кунда 100 мингта аҳоли хонадонининг бир кунлик истеъмолига тенг эканлиги айтилди.
Текшириш давомида аниқланишича, SHIRINA PETROL электрон газ ҳисоблаш ускунасига ташқи таъсир кўрсатиш имкони бўлган. Ўтказилган эксперимент давомида конфигурация созламаси технологик йўриқномалар талабига мос эмаслиги сабабли қайта ҳисоб-китоб қилинган. Бунинг натижасида 1 млрд 274 млн 700 минг сўм миқдорида зарар етказилганлиги аниқланган.
CLEAN GAS SERVICE томонидан эса шартнома ҳужжатларидан ташқари 1 дона компрессор ускунаси ортиқча ўрнатилганлиги сабабли амалга оширилган қайта ҳисоб-китоб натижасида 360,5 млн сўм зарар етказилганлиги аниқланган.
Мазкур ҳолатлар бўйича ўтказилган текширув ҳужжатлари қонун доирасида чора кўрилиши учун ҳуқуқни муҳофаза қилиш органларига юборилган.
