19 ноябрь куни АОКА мажлислар залида Олий Мажлис Сенати аъзолари иштирокида матбуот анжумани бўлиб ўтди.
Тадбирда Kun.uz мухбири Сенат томонидан 5 ой олдин маъқулланган «Давлат тили тўғрисида»ги қонунга ўзгартиш ва қўшимчалар киритиш ҳақида»ги қонуннинг кейинги тақдири билан қизиқди. Ушбу қонун 26 июнь куни Сенат ялпи мажлисида маъқулланган эди.
Фото: Сенат расмий сайтидан скриншот
Сенатнинг Суд-ҳуқуқ масалалари ва коррупцияга қарши курашиш қўмитаси раиси Наримон Умаров бу қонун янги таҳрирда Сенатга ҳали кирмаганини билдирди (видео).
««Давлат тили тўғрисида»ги қонун янги таҳрирда бизга кирмаган. Буни кимлардир ишлаётганидан хабаримиз бор. Лекин бу ҳали лойиҳа сифатида ҳам кўрилмаган. Маълумотингиз учун, Қонунчилик палатасидан бизга ҳали кириб келмаган», — деди Умаров.
Наримон Умаров. Фото: Xabar.uz
Шундан сўнг журналист тушунмовчилик бўлаётгани, ушбу қонун Сенатда аллақачон маъқулланганини тушунтиришга уринди. Аммо Наримон Умаров янглишмаётганини қатъий таъкидлади.
«Биз кеча-кундуз Сенатда ўтириб ишлаймиз, сиз эса ёдингизга бир келганда Сенат билан гаплашасиз. Кирган бўлса, айтардик. Кирган дердик. Қонунчилик палатасидан сўранг. Бизда йўқ. Нима, ёш болага ўхшаб бир-биримизни аниқлаштирамизми энди? Кимдир сайлов олдидан қонунда ўзгариш қиламан деб юрибди, лекин бу ҳали ўзгариш дегани эмас. У қонун ҳали кириши керак, лойиҳа сифатида қабул қилиниши керак», — деди Сенат аъзоси.
Қонунчилик палатаси «Давлат тили тўғрисида»ги қонунга ўзгартиш ва қўшимчалар киритиш тўғрисидаги қонунни Сенат томонидан маъқулланишидан бир ой аввал, 24 май куни қабул қилган эди. Қонун кучга кириши учун президент уни имзолаши керак.
Матбуот анжуманида 10 дан ортиқ сенатор, жумладан, қўмита раҳбарлари иштирок этди. Саволга бошқа ҳеч ким изоҳ бермади.
Аввалроқ, «Газета.uz» қонунга киритилган ўзгартиришлар ҳақида батафсил ёзган эди.
