2 август куни президент имзолаган қонунга кўра, Меҳнат кодексига ходим эмланишдан бош тортган ҳолда иш берувчи уни вақтинча ишдан четлатиши мумкинлиги ҳақида ўзгартиш киритилган эди.
Шунга мувофиқ ўтган давр мобайнида Санитария-эпидемиологик осойишталик ва жамоат саломатлиги хизмати томонидан мазкур нормага риоя қилиниши юзасидан 27 923 та текширишлар ўтказилди. Бу ҳақда СЭОМ ахборот хизмати хабар берди.
Маълум қилинишича, текширувларнинг 7 905 таси хўжалик юритувчи субъектларда, 20 018 таси бюджет ташкилотларида ўтказилган.
Қайд этилишича, текширишлар давомида жами 50 056 нафар вакцина олмаган шахслар аниқланди. Уларнинг 11 244 нафари хўжалик юритувчи субъектларда, 38 812 нафари бюджет ташкилотларида фаолият кўрсатувчи ходимларини ташкил этди.
Вакцина олмаган 26 008 нафар шахслар ишдан вақтинчалик четлатилган. Яна 2 225 та холатда иш берувчига нисбатан жарима чораси, 175 та объектга нисбатан эса фаолиятини вақтинчалик муддатга тўхтатиш чораси қўлланилган.
Маъмурий жавобгарлик тўғрисидаги кодекснинг 54-моддаси 2-қисмига асосан (Эпидемияларга қарши кураш қоидаларини бузиш) фуқароларга базавий ҳисоблаш миқдорининг йигирма баравари, мансабдор шахсларга эса — ўттиз баравари миқдорида жарима солишга сабаб бўлади.
Аввалроқ Тошкент вилоятидаги тадбиркорлик субъектлари ва бюджет ташкилотларида эмланишдан бош тортган жами 3229 нафар ходим ишдан четлатилгани, 374 нафари эса жаримага тортилгани ҳақида хабар берилган эди.
