13 ноябрь куни Москва вилоятининг Солнечногорск шаҳарчаси Прибрежная кўчасида жойлашган қурувчиларнинг вақтинча турар жойида ёнғин юз берган. Ёнғинда 2 киши жароҳатланган ва 4 киши вафот этган. Ташқи меҳнат миграцияси агентлиги вафот этганларнинг барчаси Ўзбекистон фуқаролари эканини тасдиқлади.
Қайд этилишича, Ташқи меҳнат миграцияси агентлигининг Москва шаҳридаги ваколатхонаси ушбу ҳолат юзасидан Фавқулодда вазиятлар вазирлиги ходимлари билан алоқа ўрнатган.
Агентлик томонидан вафот этганларнинг шахсига аниқлик киритилди. Маълум бўлишича, ёнғинда вафот этганларнинг барчаси Ўзбекистон фуқаролари (Ш.А. 1969 й.т., Э.У. 1998 й.т., Ш. К. 1987 й.т., А.Р. 1998 й.т.) экани аниқланган.
«Ушбу ҳолат нозоратга олинган ва вафот этган юртдошларимиз жасадларини Ватанга қайтариш чоралари кўрилмоқда», — дейилади агентлик хабарида.
Эслатиб ўтамиз, «Газета.uz» 2020 йилнинг май ойида Москва вилоятининг Раменский туманидаги шахсий турар-жойда ёнғин оқибатида 6 нафар Ўзбекистон фуқароси ҳалок бўлгани ҳақида хабар берган эди.
