Россиянинг «Зарубежнефть» давлат нефтгаз компанияси Ўзбекистондаги Jizzakh Petroleum компаниясининг улушини сотиб олиш имкониятини кўриб чиқмоқда. Бу ҳақда учта манбага асосланиб «Коммерсантъ» хабар берди.
Нашр маълумотларига кўра, битим шартлари ҳозирча келишилмаган. Jizzakh Petroleum компаниясини Россиянинг «Лукойл» компаниясига «кўрсатишган» эди, лекин ҳамкорлик «ўхшамади», деган нашр суҳбатдошларидан бири.
«Зарубежнефть» компанияси эса битим бўйича изоҳ бермаган, бироқ «келгусида Ўзбекистонда ривожланишга» қизиқиш борлигини маълум қилган.
«Компания МДҲ давлатларидаги операцияларини кенгайтириш устида ишламоқда, шу жумладан Қозоғистонда ҳам, ва ушбу минтақада нефть ва газ қазиб олиш бўйича кластер шакллантиришга умид қилмоқда», — дея таъкидлаган нефть компанияси вакили.
2019 йилда «Зарубежнефть» Ўзбекистондаги Жанубий Оламишиқ, Хартум ва Шарқий Хартум конларида иш олиб борувчи Andijanpetro ҚКнинг 50%ни сотиб олган эди. 2021 йилда 20 минг тонна нефть қазиб чиқариш режалаштирилган.
Fitch агентлигиги мутахассиси Дмитрий Маринченконинг сўзларига кўра, Ўзбекистон жуда кам нефть қазиб олади — кунига 50 минг баррель атрофида. Ушбу ҳажм иқтисодиёт эҳтиёжларини қопламайди.
Унинг фикрига кўра, захираларнинг 15 йилга етишидан келиб чиққан ҳолда Ўзбекистонда нефть қазиб чиқаришни назарий жиҳатдан икки бараварга ошириш мумкин. Лекин бунинг учун инвестициялар, шу жумладан янги бурғулаш қурилмалари ва технологиялар керак — бундай ҳолатда хорижий инвесторларни жалб қилиш соҳа учун одатий ҳолат, дейди таҳлилчи.
Jizzakh Petroleum ҳақида
Jizzakh Petroleum қўшма корхонаси 2017 йилнинг июнь ойида «Ўзбекнефтгаз» ва Gas Project Development Central Asia (Gazprom International шўба корхонаси) томонидан ташкил этилган. Лойиҳага мувофиқ, «Ўзбекнефтгаз» компанияснинг улуши 60% дан 30% гача камайиб бориши ва хорижий таъсисчиларнинг улуши эса 40%дан 70%гача ошиб бориши керак эди.
2020 йил июнь ойига кўра таъсисчилар таркиби қуйидагича кўриниш олган эди: Кипрдаги Belvor Holding Limited (68%), «Ўзбекнефтгаз» (30%) ва Gas Project Development Central Asia (2%). 2021 йил февраль ойи бошида «Ўзбекнефтгаз» ва Belvor Holding Limited 49%дан улушга эгалик қилар эди.
Май ойининг охирида «Ўзбекнефтгаз» таъсисчилар таркибидан чиқди ва эндиликда Belvor Holding Limited 98% улушларга эгалик қилади. Бундан ташқари, компаниянинг юридик номи ва мақоми ўзгарди. Эндиликда бу Sanoat Energetika Guruhi хорижий компанияси.
ОАВлар Belvor Holding Limited компаниясининг Eriell Group нефтсервис компанияси ва Enter Engineering (Ўзбекистондаги энг йирик EPC-пудратчиларидан бири, акциядорлари орасида «Газпромбанк» бор) бошқарув раиси, тадбиркор Бахтиёр Фозилов билан боғлиқлиги борлигини айтишади.
2020 йил июнида Jizzakh Petroleum Фарғона нефтни қайта ишлаш заводини ишончли бошқарувга олган эди.
Jizzakh Petroleum сайтидаги маълумотларга кўра, компания улушига Ўзбекистонда қазиб олинадиган нефтнинг 80% ва 105 та конда аниқланган нефть захираларининг тахминан 22% тўғри келади. 2020 йилда 498,7 минг тонна нефть ва 497,4 млн кубометр табиий газ қазиб олинган.
Олдинроқ, «Газета.uz» 2021 йил 1 январь ҳолатига кўра, Ўзбекистонда «Лукойл» компанияси 413,1 млрд куб метр (22,1%), Uz-Kor Gas Chemical 109,6 млрд куб метр (5,9%), Surhan Gas Chemical 106,6 млрд куб метр (5,8%), Jizzakh Petroleum 84,9 млрд куб метр (4,5%) газ захираларига эга конларда фаолият юритиши ҳақида хабар берган эди.
