Жаҳон соғлиқни сақлаш ташкилоти (ЖССТ) раҳбари Тедрос Гебреисус Берлиндаги Бутунжаҳон соғлиқни сақлаш конференцияси очилишида сўзлаган нутқида инсоният коронавирус пандемиясини енгиб ўтишининг учта асосий шартини санаб ўтди, дея хабар қилмоқда «Корреспондент.net» нашри.
Гебреисуснинг сўзларига кўра, қуйидаги шартлар бажарилган ҳолда, вакцинация ёрдамида COVID-19 пандемиясини енгиб ўтиш мумкин бўлади:
- COVAX механизми бўйича вакцина етказиб бериш устувор вазифага айланса;
- G20 давлатлари вакцинани тарқатиш бўйича ўз мажбуриятларини бажарса;
- вакцинани ишлаб чиқувчилар интеллектуал мулк ҳуқуқларини бекор қилиб, технология ва лицензиялар билан бўлишсалар.
Шунингдек, нашрнинг ёзишича, соғлиқни сақлаш тизимига ортиқча юкланиш ҳолати бўлмаса, ЖССТ коронавирус пандемияси тугаганлигини эълон қилиши мумкин. Бу ҳақда ЖССТнинг Европа бўйича минтақавий директори Ханс Клюге La Vanguardia нашрига берган интервьюсида маълум қилган.
«Биз вирус билан яшашни ўрганишимиз керак. COVID-19 беморлари госпитализацияси ва ўлими сабабли Соғлиқни сақлаш тизимига ортиқча юкланиш бўлмаса, яъни илгари кўрсатилган хизматларни кўрсатиш имконига эга бўлсак, пандемия эндемик бўлиб қолиши мумкин», — дея таъкидлаган Клюге.
