Тошкент шаҳар ҳокимлиги матбуот хизмати Аҳмад Дониш, Себзор ва Нурафшон кўчалари кесишмасида транспорт ҳаракатини ташкил этишнинг янги схемаси ҳақида репортаж эълон қилди.
Чорраҳанинг асосий принсипи — «фақат тўғрига ҳаракат"ланишдан иборат. Ўнгга бурилиш учун 50−100 метрлик икки қатор йўл («кармашка») ташкил этилган. Чапга бурилиш учун эса Нурафшон кўчасидан светофорли махсус йўналишлар, Аҳмад Дониш ва Себзор кўчаларидан эса айланма йўллар ва ортга қайрилиш қаторидан ўтувчи ҳаракат йўллари ажратилган.
Репортажда айтилишича, шаҳардаги аксарият чорраҳаларда машиналар тўғрига, ўнгга ёки чапга ва баъзи ҳолларда ҳаттоки ортга қайрилиб олиш мумкин, бу эса транспорт воситаларининг тўпланишига ва тирбандликни келтириб чиқаришга сабаб бўлмоқда.
Лойиҳа раҳбари Фират Коч интервьюда барча қўшимча йўллар ҳисобига эндиликда чорраҳадан 600−700 тага яқин автомобиль ўтиши мумкинлигини маълум қилган.
Светофорда турган ва автомобиллар орасида 8−10 метр масофа мавжуд, бу масофа орасидаги чизиқларда эса 2 тадан (4 қизиқли йўлда 8−10 та) автомобиль жойлашиши мумкин. Таъкидланишича, автомобилларни светофорга яқинроқ жойлаш орқали тирбандликни олдини олиш мақсад қилинган.
«Бизнинг лойиҳамиз бўйича ушбу чорраҳада чапга ҳаракатланувчи 1000 та автомобиль тўпланса ҳам бу ерда тирбандлик ҳосил бўлмайди. Бунга ишонч ҳосил қилиш учун биз махсус дастурлар орқали бу жараённи ҳисоблаб, текшириб кўрдик», — деди туркиялик мутахассис.
Репортажда шунингдек, лойиҳалаштириш ишлари давомида аҳоли фикри ҳам инобатга олингани айтилмоқда. Шу кунларда чорраҳа атрофида пиёдалар йўлакчаларини янгилаш, яшил ҳудудларни ташкил этиш жараёнлари давом этмоқда.
Шунга қарамасдан, видеолавҳаларда барча пиёдалар ўтиш жойларида ҳам хавфсизлик чоралари мавжуд эмаслигини кўриш мумкин.
Юнусобод туманидаги Аҳмад Дониш кўчаси (ўтган йили ёзда) реконструкция қилинганидан сўнг, аҳоли унинг жуда кенглиги ва пиёдалар ўтиш жойлари мавжуд эмаслигидан шикоят қилган эди.
Баҳорда Транспорт вазирлиги ва Тошкент шаҳар ИИББ ҳам Фарғона йўли кўчасидаги қайта ташкил этилган чорраҳаларда «фақат тўғрига ҳаракатланиш» тартиби бўйича қўлланмани эълон қилганди. Ўшанда ҳайдовчилар кўчалардан «нотўғри фойдаланаётгани» айтилганди.
