Президентнинг тўнғич куёви, тадбиркор Ойбек Турсунов «Капиталбанк» устав фондидаги улушини 50 фоизга оширди, бу фонд биржаси маълумотларида акс этган. Бунга Spot нашри эътибор қаратди.
Биржадан ташқари битим 29 октябрь куни тузилган. Акциядор 112,49 млн оддий банк акцияларини сотиб олди — бу акциялар умумий сонининг 34,1 фоизи дегани. Бунга қадар у 52,43 млн акцияга эгалик қилиб келаётган эди.
2019 йилда Ойбек Турсуновга қарашли Promadik Invest компанияси «Капиталбанк» банкининг 40,13 млн (36 фоиз) акцияларини сотиб олганди. Ўша йили мазкур битим банк секторидаги энг йирик келишувлардан бирига айланганди.
1 ноябрдаги сўнгги битимдан кейин Promadik Invest аффилланган шахслар рўйхатидан чиқарилиб, унинг ўрнига Ойбек Турсуновнинг ўзи қўшилганди.
2020 йилга келиб Турсунов шунингдек, Uzcard устав фондининг 75 фоиз акцияларини ҳам харид қилганди. Бироқ, кейинчалик 51 фоизлик бошқарув пакети Миллий банкка ўтиб кетди, яна 6 фоиздан акцияларга тўртта бошқа банклар эгалик қила бошлади.
