Президент Шавкат Мирзиёев видеоселектор йиғилишида цемент импорти учун имтиёзлар муддати яна бир йилга узайтирилиши маълум қилди, деб хабар бермоқда унинг матбуот котиби Шерзод Асадов.
Қайд этилишича, цемент ишлаб чиқарувчиларга фойда солиғи 20 фоиздан 15 фоизгача, ер қаъридан фойдаланганлик солиғи эса 2 бараварга камайтирилади.
«Бу 1 тонна цементнинг ишлаб чиқариш таннархини 7 фоизга қискартириш имконини беради. Булар ҳам уйларнинг нархини сезиларли туширишга олиб келади», — дея таъкидлаган давлат раҳбари.
Март ойида «Газета.uz» 1 апрелдан 1 октябргача цемент маҳсулотларини Ўзбекистонга олиб киришда божхона божининг ноль ставкаси қўлланилиши ҳақида ёзган эди. Бу мамлакатда қурилаётган уй-жойлар нархини арзонлаштириш мақсадида амалга оширилиши айтилган.
Ҳукумат 1 апрелдан 1 декабргача муддатда цемент маҳсулотларини олиб кириш учун божхона божини бекор қилди. Бунгача бож ставкаси 30 фоизни ташкил этган эди.
2021 йилнинг дастлабки тўрт ойида мамлакатга 50,5 миллион долларлик 1 млн тонна цемент олиб кирилди, бу ўтган йилнинг шу даврига нисбатан 515,1 минг тоннага кўпдир. Таққослаш учун: 2020 йилда 131 млн долларга 2,5 млн тонна цемент импорт қилинган.
Август ойи охирида 1 октябрдан бошлаб цемент (клинкер) ишлаб чиқарувчилар учун фойда солиғининг ставкаси 15 фоизгача пасайтирилиши ҳақида хабар берилган эди. Маҳаллий ишлаб чиқарувчилар импорт маҳсулотлари билан рақобатлаша олмаётгани учун бу ҳақда президентдан тадбиркорлар билан учрашувда сўралган эди.
