Ўзбекистонлик тоғ чанғичиси Комилжон Тўхтаев 2022 йилда Пекинда бўлиб ўтадиган қишки Олимпиада ўйинларига йўлланмани қўлга киритди, деб хабар берди Чанғи спорти федерацияси матбуот хизмати.
Спортчи «слалом» ва «гигант слалом» йўналишларида саралаш баҳсларидаги чиқишлар доирасида очколар миқдори бўйича белгиланган меъёрларни бажарди. Энди Ўзбекистон Миллий олимпия қўмитаси спортчининг Ўйинларда иштирок этиши учун ариза бериши керак.
Чанғи спорти федерацияси тасдиқлади, Туризм ва спорт вазирлиги эса 2022 йилги Қишки Олимпия ўйинларига тўрт нафар спортчининг (2 асосий ва 2 захира) ўқув-машғулот йиғинлари ҳамда саралаш мусобақаларига тайёргарлик кўриш дастурини молиялаштиради. Ўқув-машғулот йиғинлари Италия, Австрия ва Россияда бўлиб ўтади.
Ўзбекистон Халқаро олимпия қўмитаси қоидаларига кўра, тоғ чанғиси бўйича фақат 2 квота (1 аёл, 1 эркак) талаб қилиши мумкин.
Саралаш даври 2019 йил 1 июлдан бошланган. Унинг якунига — 2022 йилнинг 16 январига қадар — Ўзбекистон 2022 йилги қишки Олимпия ўйинларига навбатдаги йўлланмани қўлга киритиши мумкин.
«Ўзбекистон чанғи спортининг бошқа турлари — сноуборд, фристайл, ски-крос, чанғи югуриш турлари бўйича яна бир қанча лицензияларни олиш имкониятига эга. Федерациянинг чанғи спортини ривожлантириш бўйича таклифлари аввалроқ тайёрланиб, Ўзбекистон Миллий олимпия қўмитаси ҳамда Туризм ва спорт вазирлигига тақдим этилган», — дейилади федерация хабарида.
Бундан ташқари, федерация вакиллари анъанага кўра, ёзги Олимпия ўйинларига лицензия олиш учун давлат томонидан спортчига 100 миллион сўм, мураббийга эса 50 миллион сўм миқдорида мукофот пули ажратилишини эслатиб ўтди.
«Афсуски, бу амалиёт фақат ёзги Олимпия ўйинларига тегишли. Қишки Олимпия ўйинларига йўлланмаларни қўлга киритганлик учун бундай рағбатлантирувчи мукофотлар тўланса, адолатдан бўларди», — дея таклиф қилди федерация.
Қишки Олимпия ўйинлари Пекинда 2022 йилнинг 8−20 февраль кунлари бўлиб ўтади. Ўтган 2018 йилги Ўйинларда ўзбекистонлик чанғичи Комилжон Тўхтаев ва фигурали учувчи Миша Ге иштирок этганди.
