Англияда икки поезд тўқнашиб кетиши оқибатида 17 киши жароҳатланди
Англиянинг Солсбери шаҳрида икки поезд тўқнашиб кетди. Оқибатда 17 киши жароҳатланган, поезд ҳайдовчиларидан бири эса тиқилиб қолган, дея хабар берди хабар берди BBC. Поезд ҳайдовчиларидан бирига тез тиббий ёрдам кўрсатилган.
Тўқнашув South Western Railway ва Great Western хизмати поездлари иштирокида содир бўлган. Хабарга кўра, поездлардан бири туннелдаги объектга урилган, иккинчи поезд эса сигнализация муаммоси туфайли у билан тўқнашган. Жабрланганларнинг ҳаммаси касалхонага ётқизилган, уларнинг жароҳати жиддий эмас. Ҳозирда ҳалокат жойида 50 нафар ўт ўчирувчи, шунингдек, полиция ва тез ёрдам ходимлари иш олиб бормоқда. Поездлар ҳаракати эса тўхтатиб қўйилган.
Токиода ўлим жазосига ҳукм қилиниш учун метрода йўловчиларга ҳужум қилган шахс ушланди
31 октябрь куни Токио метросида йўловчиларга пичоқ билан ҳужум қилган эркак полицияга «одамларни ўлдирмоқчи бўлганини ва ўлим жазосини олмоқчи эканини» тан олди, деб хабар берди Kyodo агентлиги.
Қайд этилиша, ҳужум қилган шахс воқеа жойида қўлга олинган, у қаршилик кўрсатмаган. Эркак ўзини Киота Хаттори деб таништирган, у 24 ёшда. Хабарга кўра, ҳужум вақтида у маскарад либосида бўлган.
Гувоҳларнинг сўзларига кўра, ҳужум пайтида эркакнинг бир қўлида ошхона пичоғи, иккинчи қўлида эса пластик шиша бўлган. Хаттори аввалига саккизинчи вагондаги кекса одамга пичоқ билан ҳужум қилган, кейин эса олтинчи вагонга ўтиб, у ерда ёнғин чиқарган. Кейинчалик Хаттори қўлидаги суюқликни тўкиб юборган ва ўт қўйган.
Жабрланганлар сони 17 кишини ташкил қилмоқда. Кекса одамнинг кўкрагига пичоқ билан урилган зарбадан кейин унинг аҳволи оғир экани айтилмоқда. Қолган 16 нафари енгил тан жароҳати олган ёки тутундан заҳарланган.
Икки йиллик танаффусдан сўнг илк марта G20 давлатлари етакчилари юзма-юз учрашди
Якшанба куни Римда пандемия бошланганидан бери биринчи марта юзма-юз ўтказилган G20 давлатлари етакчиларининг саммити якунланди. G20'га раислик қилаётган Италия якунда эришилган натижалардан мамнунлигини билдирди. Бу ҳақда ТАСС нашри хабар берди.
БМТ Бош котиби Антониу Гутерриш Римни тарк этар экан, Twitter’да саммит «умидларни оқламаганини», бироқ «умидлар ҳали бутунлай сўнмаганини» ёзди.
Иқтисодиёт бўйича G20 мамлакатлари етакчилари энг юқори сиёсий даражада йирик корпорацияларга 2023 йилда кучга кириши керак бўлган 15 фоизлик минимал глобал солиқни жорий этиш тўғрисида қарорни маъқуллади. Бу солиқ тарафдори бўлган АҚШ президенти Жо Байден йирик компаниялар учун минимал глобал солиқнинг жорий этилиши жаҳон иқтисодиётини ўзгартиришига ишонишини билдирган.
Италия пойтахтидан барча дунё етакчилари Глазгога кўчиб ўтмоқда, у ерда БМТнинг иқлим ўзгариши бўйича доиравий конвенцияси бўлиб ўтади. Иқлим ўзгаришига қарши кураш чоралари бўйича муҳокамалар давом этади.
Испанияда Хеллоуин кунида отишма юз берди
РИА Новости маълумотларига кўра, Хеллоуин кунида Торрент (Валенция провинцияси, Испания) қабристонида юз берган отишмада икки киши ҳалок бўлди.
Бир киши икки қарама-қарши лўли уруғининг отишмаси қурбони бўлди, яна бири юрак хуружидан вафот этди ва бу фавқулодда ҳолат отишма билан боғлиқ эмас, деб ёзади Las Provincias.
Шу билан бирга, отишма ўзаро урушаётган кланлар ўртасида эмас, балки бир оила аъзолари ўртасида содир бўлган. Ҳалок бўлган шахс 45 ёшда, унинг 20 ёшли ўғли эса яраланган. Шунингдек, қабристонга ташриф буюрган 79 ёшли қария юрак хуружидан вафот этгани хабар қилинган.
Украинанинг Киев шаҳрида ку-клукс-клан либосидаги шахслар ирқчиликка қарши намойиш ўтказди
Ку-клукс-клан кийимидаги одамлар якшанба куни Киев марказида митинг ўтказдилар, улар қўлларида ирқчиликка оид ёзувлар ёзилган плакатларни ушлаб турди, деб хабар беради Риа Новости.
«Кеча Киевда ирқчиликка қарши митинг бўлиб ўтди. Ку-клукс-клан кийимидаги одамлар „Ҳа, биз ирқчилармиз, ККК қайтди“, „White Power“ плакатлари билан Киев марказидан ўтишди», — дейилади нашр баёнотида.
Август ойида Украинада ирқчилик можароси авж олди. Киевда номаълум шахслар юнон-рум кураши бўйича украиналик Олимпиада чемпиони ва Олий Рада депутати Жан Беленюкнинг олдига бориб, унинг ирқини ҳақорат қилган. Украина ҳуқуқ-тартибот идоралари ходимлари бу бўйича жиноий иш қўзғатган. Украина президенти Владимир Зеленский ушбу воқеани изоҳлар экан, Украинада ирқчилик кўринишларига йўл қўйиб бўлмайди, дея таъкидлаган. Кейинчалик Белениук радикал мухлислардан қўрқиб, ирқчилик намоён бўлгани учун стадионга футбол томоша қилиш учун бормаганини айтган — Риа Новости.
Қирғизистон президенти Садир Жапаровнинг самолёти Буюк Британияга киритилмади
Қирғизистон президенти Садир Жапаровнинг самолёти техник талабларга жавоб бермагани учун Буюк Британияга киритилмади, деб хабар бермоқда президент маъмуриятига таяниб Sputnik Қирғизистон.
«Давлат раҳбари учаётган „Борт №1 — ТУ-154“ самолёти Европа Иттифоқи ва Буюк Британиянинг техник стандартларига жавоб бермайди. Шу муносабат билан Қирғизистон томонига ушбу турдаги самолётларни қўндиришнинг иложи йўқлиги ҳақида хабар берилган», — дейилади хабарда.
Хабарга кўра, Жапаров Глазгога Embraer Lineage 1000 хусусий самолётида учган. Президент ҳозир Буюк Британияга етиб келган ва у сешанба куни саммитда нутқ сўзлайди.
Шунингдек:
- 1 ноябрь ҳолатига кўра дунё миқёсида COVID-19 қурбонлари сони 5 миллиондан ошди. COVID-19 тестини ўтказиш имкониятининг чекланганлиги ҳамда одамлар уй шароитида тиббий ёрдамсиз ҳалок бўлаётгани сабабли, айниқса, Ҳиндистон каби дунёнинг қашшоқ мамлакатларида, бу ҳисоб-китоблар ҳақиқий ҳолатни акс эттирмаслиги мумкин. Яъни расмий статистика реал воқеликдаги ўлим ҳолатлари сонидан камроқ бўлиши мумкин — Associated Press
