UzAuto Motors компанияси Chevrolet Lacetti ҳамда Labo автомобилларини октябрь-ноябрь ойларида кутаётган харидорлар машиналарни 2 ой кечиккан ҳолда олишини маълум қилди.

Яримўтказгичлардан (микрочиплардан) тайёрланган бутловчи қисмларнинг глобал тақчиллиги сабабли компания автомобилни етказиб бериш бўйича илгари тузилган шартноманинг 1.2 бандига мос равишда шартномага 3.1.1 бандни киритишга мажбурлигини хабар қилди.

«Бошқача айтганда, UzAuto Motors’га боғлиқ бўлмаган ҳолатлар туфайли, компания 3.1 бандда кўрсатилган Chevrolet Lacetti ҳамда Labo автомобилларининг кутилаётган етказиб бериш муддатини 2 ойга узайтиришга мажбур», — дейилади хабарда.

Шунингдек, компания ушбу «экстремал чора» истеъмолчилар томонидан тўгри қабул қилинишига умид билдирган.

Эслатиб ўтамиз, аввалроқ жорий йилнинг 8 ойи мобайнида UzAuto Motors 130,4 мингта автомобиль ишлаб чиқаргани, август ойида эса 5534 та, жумладан 350 та Cobalt, 177 та Nexia, 2 та Lacetti ва битта Spark ишлаб чиқаргани хабар қилинганди. Кейинчалик, яримўтказгичларнинг танқислиги сабабли мижозлардан ўриндиқларнинг иситиш тизимисиз Cobalt автомобилини қабул қилишлари сўралганди.

Шунингдек, UzAuto Motors микрочиплар етишмаслиги сабаб автомобилларни ун омборида сақлашга мажбур бўлаётгани ҳақида хабар берилганди.

Шу кунларда «Газета.uz» иккиламчи бозорда кўпгина автомобиль моделларининг нархи сезиларли даражада ошгани ҳақида ёзган эди. Иккиламчи автомобиль бозорида нархларнинг кескин ўсиши янги маҳаллий автомобилларни ишлаб чиқариш секинлашиши билан боғлиқ бўлиши мумкин ва талабнинг ўзгаришсиз ўсиб бориши иккиламчи бозорнинг фаоллашишига олиб келди, дея қайд етган Иқтисодий тадқиқотлар ва ислоҳотлар маркази.