Ўзбекистонлик спорт гимнастикачи Оксана Чусовитина Яшнобод тумани Давлат хизматлари марказида спорт таълими фаолияти билан шуғулланиш учун «Chusa sport team» масъулияти чекланган жамиятини рўйхатдан ўтказди. Бу ҳақда Туризм ва спорт вазирлиги хабар берди.
«Машҳур спортчи кўрсатилган давлат хизмати сифати ҳамда бир жойда кўплаб хизматлардан фойдаланиш имкони яратилганидан мамнун эканлигини билдирди», — дейилади хабарда.
Фото: Туризм ва спорт вазирлиги
Оксана Чусовитина спорт гимнастикаси бўйича Олимпия ўйинларида энг кўп иштирок этган спортчи (1992, 1996, 2000, 2004, 2008, 2012, 2016, 2020) ҳисобланади. 1992 йил Барселонада ўтган Олимпия ўйинлари олтин медали соҳиби, 3 карра Жаҳон чемпиони.
Оксана Чусовитина еттита ёзги Олимпия ўйинларида иштирок этган ер юзидаги ягона аёл гимнастикачи сифатида Гиннеснинг рекордлари китобига киритилган. Токиодаги олимпиада унинг учун саккизинчиси эди.
Июль ойида Оксана Чусовитина спортдаги фаолиятини якунлагани ҳақида хабар берилди.
У «Газета.uz»га берган интервьюсида мураббий бўлмаслигини айтиб ўтган эди. «Мен Ўзбекистонда болалар ва ёшлар спортини ривожлантирмоқчиман, ва шу йўналишда ҳаракат қиламан, айнан соғлом миллатни шакллантириш учун», — деган эди Оксана Чусовитина.
Август ойида Оксана Чусовитина «Ўзбекистон Республикасида хизмат кўрсатган спорт устози» фахрий унвони билан тақдирланди. Шунингдек, Оксана Чусовитина спорт маҳорати мактабини ташкил этиш ва уларнинг фаолияти учун барча зарур шароитлар яратишга топшириқ берилган эди.
Октябрь ойи аввалида Чусовитина спортга қайтишини маълум қилди. У келаси йил ўтказиладиган Осиё ўйинларида қатнашиш ниятида. «Мен, шунчаки, фаолиятимни Ўзбекистон учун медалсиз якунлай олмайман», — деди у.
