Ўзбекистон ўз ҳудудида АҚШ ҳарбийларини жойлаштириш заруриятини кўрмаяпти, Вашингтон бу позицияни тан олади, деди ташқи ишлар вазири Абдулазиз Камилов пайшанба куни россиялик журналистларга.
ТИВ раҳбари 22 октябрь куни ўтказган матбуот анжуманида «Первый канал», «Россия 24», «НТВ» телеканаллари, ТАСС АА, «Коммерсанть» ва «Комсомольская правда» газеталари мухбирлари иштирок этди. Учрашув икки соатга яқин давом этди.
«Бугунги реаллик шуки, бунга эҳтиёж йўқ», — деди Абдулазиз Комилов Ўзбекистон ҳудудига АҚШ ҳарбийларини жойлаштириш имконияти ҳақидаги саволга жавоб берар экан.
ТИВ раҳбари 2002 йилда имзоланган Ўзбекистон ва АҚШ ўртасида стратегик шериклик тўғрисидаги декларацияда ва президент Шавкат Мирзиёевнинг 2018 йилда Вашингтонга ташрифи якунлари бўйича қўшма баёнотда ўзаро ҳамкорликнинг стратегик йўналишлари белгилаб берилганини ва «ўзаро муносабатларимизнинг чегаралари» баён этилганини эслатиб ўтди.
«Ва кўплаб ҳар йиллик сиёсий маслаҳатлашувлар, кўплаб жиддий учрашувлар чоғида америкаликларга етказилди ва улар қарийб барчасини тушунишди ҳамда сиз айтаётган нарсалар Ўзбекистон учун мутлақо қабул қилиб бўлинмас эканлигини тан олишди ва улар кўтариб чиқилмайди ва муҳокама қилинмайди», — дея қўшимча қилди у.
Олдинроқ, Американинг Politico нашри АҚШ конгрессидаги манбаларига таяниб, Пентагон расмийлари шу ой Ўзбекистонга ташриф буюриб, терроризмга қарши курашиш кучларини жойлаштиришни муҳокама қилмоқчи эканлиги ҳақида хабар берган эди. ТИВ раҳбари Абдулазиз Камилов Ўзбекистон ҳудудида АҚШнинг терроризмга қарши курашиш бўйича қуролли кучларини жойлаштириш имконияти муҳокама қилинмаётгани ва бу масала кун тартибида ҳам тургани йўқлигини маълум қилди. Бир неча кундан кейин АҚШнинг Тошкентдаги элчиси Даниэл Розенблюм АҚШ мудофаа вазири ёрдамчиси Кристофер Маер Ўзбекистонда чегара хавфсизлиги масалалари бўйича музокаралар ўтказганини маълум қилди.
