ЎзЛиДеП партиясидан президентликка номзод Шавкат Мирзиёев жиззахлик сайловчилар билан учрашувда коронавирус пандемияси даврида аҳолининг саломатлигини сақлаш учун 80 трлн маблағ сарфланганини маълум қилди. Бу ҳақда «Микрофон кўтарган аёл» Телеграм-канали хабар берди.
«Менга 80 трлн эмас, бир инсоннинг ҳаёти муҳимроқ. Мана кўряпмиз, коронавируснинг бошқа штаммлари ҳам чиқяпти. Бу бизни безовта қиляпти. Қиш келяпти. Ҳозир грипп кучайяпти, айниқса Тошкентда грипп кўпайди», — дея қўшимча қилди Шавкат Мирзиёев.
Маълумот учун, 2020 йилда Ўзбекистонда коронавирус пандемиясига қарши курашиш бўйича тадбирларга 4 трлн сўмдан ортиқ маблағ сарфлангани ҳақида хабар берилган эди.
Шавкат Мирзиёев коронавирусни янги штаммлари пайдо бўлаётганини ҳам таъкидлади. Унинг айтишича, «биз „бу шунчаки грипп экан“ деб қарамаслигимиз керак».
«Бу ниҳоятда оғир касаллик, эмланишга жиддий қарашимиз керак. Ҳар биримиз ўз соғлигимизга эътибор қилишимиз керак. Соғлом одам эртанги кун учун режа қилади, мана шуни ҳаммамиз тушуниб олишимиз шарт. Олдимизда қиш, шамоллаш кенг тарқаляпти, шундай пайтда профилактика талабларини бажаришимиз зарур», — деди ЎзЛиДеП партиясидан президентликка номзод.
Президентнинг сўзларига кўра, «душанба куни мамлакатга гриппга ҳам қарши вакциналар олиб келиняпти».
«Аммо „коронавирус грипп экан“ деган гаплар ёлғон. Азиз ҳамюртларим, вакцина қилиш керак. Касаллик осон ўтади, асоратлари камроқ бўлади. Ҳар биримиз ўзимизни сақлашимиз керак», — деди ЎзЛиДеП партиясидан президентликка номзод.
Шавкат Мирзиёев нима учун Жиззах вилоятига охирги бўлиб келгани ҳақида ҳам гапирди.
«Сирдарёга келганда бир кунда келиб кетса бўларди. Лекин Жиззах менга ота юрт, мени улғайтирган замин. Ҳар бирингиз менга қадрдонсиз, сизлар билан алоҳида учрашмасам бўлмасди. Жуда кўп жойларда учрашувлар ўтказдик, бир нарсага амин бўлдимки, одамлар ўзгаряпти. Фақат ўз вилояти, ҳудуди учун эмас, бутун Ўзбекистон ривожланиши учун ҳаракат қилишяпти. Ҳамма бир гапни қайтаряпти — „Қилса бўлар экан-ку!“. Ҳар бир хонадон ўзини ўзгартирса бўлар экан-ку», — деди Шавкат Мирзиёев.
Президент Жиззахдаги қийинчиликлар ҳақида ҳам фикр билдирди.
«Жиззах Самарқанд йўлида жойлашган, Тожикистонга қўшни. Ўша пайтларда шу йўлда катта бозор қуриш учун бор йўғи 25 минг доллар сўраганимда 500 сўм ҳам берилмаганди. Текстил корхонасини йўлга қўйиш, Зарафшондан сув олиб келиш учун камида 20 та хат ёзгандим, лекин барибир амалга ошмаган. Мана, ҳозир ҳар бир вилоятда бир нечтада текстил корхоналари ишлаб турибди», — деди у.
«Мен кўп нарсани Жиззахда ўрганганман, оғир йилларим ўтган бу ерда. Кўпчилик мени пахтани яхши билади, дейишади. Лекин менинг мутахассислигим бошқа эди. Кечалари китоблар ўқиганман ва қийинчиликлар билан тажриба орттирдим. Бу ҳаёт мактабини менга Жиззах берди, мана шу юрт мени ўқитган десам ҳақиқат бўлади. Мана шу тажрибам Самарқанд вилоятида ҳокимлигида ҳам, бош вазирлигимда ҳам фойда берди, ҳозир ҳам асқатяпти», — дея қўшимча қилди Шавкат Мирзиёев.
У Жиззахда ҳаяжон сезилаётганини айтиб ўтди.
«Чунки менинг бозорим ҳам мозорим ҳам шу юрт», — деди президент.
