ЎзЛиДеПдан президентликка номзод Шавкат Мирзиёев жиззахлик сайловчилар билан учрашувда газ экспорти масаласига тўхталди.

«Авваллари газ сотардик, ҳозир сотиб олишга тайёрмиз. Чунки саноатимизга катта миқдорда газ керак. Қашқадарёдаги GTL заводимиз тайёр турибди, лекин мен ишга туширишга шошилмаяпман. Чунки бундай завод дунёда бешта. Газдан бензин олинади, қўшимча қиймат яратилади. Газ келажак авлодга қоладиган бойлик, ҳар хил шартномалар билан сотиб юборавериш керак эмас», — дея таъкидлади амалдаги давлат раҳбари.

Маълумот учун, 2020 йил январь-декабрь ойларида Ўзбекистонга газ импорти 50,4 млн долларни ташкил этган эди, бу 2019 йилга нисбатан 237,1 баравар кўпроқ. Газ экспорти эса қиймати бўйича 4,7 бараварга, яъни 2,2 млрд доллардан 478,1 млн долларга камайган эди.

2021 йилда Ўзбекистон 53,8 миллиард куб метр газ ишлаб чиқаришни режалаштирмоқда.

Бундан ташқари, президент тажриба орттираётганлигини, камбағалликни қисқартириш бўйича чораларга ҳам тўхталди.

«Камбағалчиликни қисқартириш вазирлигини ташкил қилдик, Хитой тажрибасини ўрганяпмиз. Бир вақтлар камбағал деган сўзни ишлатмасдик. Лекин мен ўзим яшаган жойни билмайманми, камбағаллик йўқми бизда?», — дейди у.

Президентликка номзод пахта масаласини ҳам эслаб ўтди.

«Пахтанинг орқасидан қанча эзилдик, лекин барака топмадик. 3 кун олдин 3 млн тонналик маррани бажаргандик. Лекин бу ҳатто телевизорда ҳам кўрсатилмади, чунки пахта манфаат келтирсагина керак. Кимга керак бўлса, етиштираверади», — дея таъкидлади Шавкат Мирзиёев.