Ўзбекистон Халқаро табиатни муҳофаза қилиш иттифоқининг 92 ва Марказий Осиё мамлакатлари орасида эса биринчи аъзоси бўлди. Бу ҳақда Экология қўмитаси матбуот хизмати хабар бермоқда.
Ўзбекистон Экология ва атроф-муҳитни муҳофаза қилиш давлат қўмитаси раиси ўринбосари Жусипбек Казбеков бошчилигидаги делегация Халқаро табиатни муҳофаза қилиш иттифоқининг Гланд (Швейцария) шаҳрида жойлашган Бош қароргоҳига ташриф буюрди. Уларни Иттифоқнинг ривожланиш гуруҳи глобал директори Энрике Ламанн кутиб олди.
Ташриф доирасида Ўзбекистоннинг Халқаро табиатни муҳофаза қилиш иттифоқига аъзолик мақомини тан олиш маросими ўтказилди.
Халқаро табиатни муҳофаза қилиш иттифоқи биохилмахилликни сақлаш соҳасида тадқиқотлар олиб борувчи, табиатнинг яхлитлигини сақлаш ва табиий ресурслардан оқилона фойдаланишга ҳисса қўшувчи дунёда етакчи ташкилот ҳисобланади. Иттифоқ 1948 йилда ЮНЕСКО ташаббуси билан ташкил этилган бўлиб, унга 120 та давлат ташкилотлари ва 91 мамлакат аъзо.
Мазкур Иттифоқ билан ўзаро ҳамкорлик Давлат экология қўмитаси билан биргаликда ишлаб чиқилаётган «Ўзбекистонда озиқ-овқат тизими, ердан фойдаланиш ва экотизимларни тиклаш», «Ўзбекистоннинг тоғли ва водийли ҳудудларида ўрмонларни барқарор бошқариш», «Марказий Осиёда табиатни муҳофаза қилиш тизимини мустаҳкамлаш орқали зооноз касалликларнинг пайдо бўлишига ландшафт мослашувчанлигини ошириш» каби қўшма грант лойиҳалари доирасида фаоллашгани қайд этилди, дейилади хабарда.
«Бу ютуқ Ўзбекистонга Глобал экологик жамғарма (ГЭФ) ва Яшил иқлим жамғармаси (ЗКФ) дан экологик лойиҳалар учун грант маблағларини жалб қилишни жадаллаштириш, республикадаги ихтисослаштирилган муассаса ва ташкилотларнинг кадрлар салоҳиятини мустаҳкамлаш ва ривожлантиришни қўллаб-қувватлаш, шунингдек, табиатни муҳофаза қилиш соҳасидаги стратегик ҳужжатларни ишлаб чиқишда Иттифоқнинг халқаро стандартларини қўллаш имкониятларини яратади», — қайд этилди баёнотда.
