Туркиялик экани тахмин қилинаётган хакер Дональд Трампнинг сайтини бузиб кирди
Ижтимоий тармоқларда RootAyyildiz номи остидаги хакер АҚШнинг собиқ президенти Дональд Трамп веб-сайтининг бўлимларидан бирини бузиб кирган. Бузилган сайт бўлимида хакер томонидан Қурьон сураларидан бирининг матни қолдирилган, дея хабар бермоқда VICE нашри. Хабарга кўра, хакернинг туркиялик экани тахмин қилинмоқда.
Шунингдек, хакер Youtube саҳифасида Туркия президенти Режеп Таййип Эрдоғаннинг миллатчилик руҳидаги видеосини ҳам эълон қилган. Ушбу хакер Трамп сайтининг бўлимини уч ой назорат қилган.
«Хакерлик қилиш мумкин бўлган жуда кўп соҳалар мавжуд. Масалан, ижтимоий тармоқлардаги ёки веб-сайтлардаги аккаунтларни бузиш мумкин. Мен активист хакерман. Мен веб-сайтлар устида анчадан бери ишлайман. Мени яхшироқ эшитишлари учун мен шу йўлни танладим», — дея қўшимча қилган хакер.
Ҳозирча Трамп вакиллари бу бўйича ҳеч қандай изоҳ бермаган.
Япония бош вазири мамлакат соҳилига КХДР томонидан баллистик ракеталар отилганини тасдиқлади
Япония бош вазири Фумио Кисида КХДР иккита баллистик ракета учирганини таъкидлади. Ҳукумат раҳбари балиқчилар кемаларига зарар етказилгани ҳақида маълумот бор ёки йўқлиги ҳақидаги журналистларнинг саволига, ҳозирча бундай маълумот йўқлигини айтди.
Кисида Япония ҳозирда ракеталарнинг учирилиши бўйича маълумотлар таҳлил қилинаётганини ҳам айтиб ўтди. У ракеталарнинг тури ва зарба майдони ҳақида батафсил маълумот бермади. Ушбу ракеталар учирилиши муносабати билан Япония бош вазири идорасида инқироз штаби ташкил қилинди. Шу билан бирга, Жанубий Корея Қуролли кучлари бундан олдин КХДР томонидан Япон денгизи томон битта баллистик ракета учирилгани ҳақида хабар берган. Унга кўра, ракета Хамгён-Намдо провинциясидаги Синпхо шаҳри яқинига тушган — ТАСС.
Вьетнамда мактаб ўқувчиси дарс пайтида мобил телефон портлашидан вафот этди
Вьетнамда Нгеан провинциясидаги мактабнинг бешинчи синф ўқувчиси пандемия туфайли масофадан таълим олар экан, телефонини қувватлагичга улаган ҳолда дарсга қўшилган ва тўсатдан телефон портлаб, боланинг кийимлари ёниб кетган. Қўшнилар жабрланувчига ёрдамга келишган ва уни тезда касалхонага олиб кетишга ҳаракат қилишган. Бироқ бола шифохонага олиб кетилаётганда вафот этган. Бу ҳақда Daily Star нашри хабар берди.
Вьетнам ОАВларининг ёзишича, боланинг оиласи полициядан ушбу фожеа сабабларини текширмасликни сўраган. Мобил қурилманинг модели ҳақида маълумот йўқ.
Грузия бош вазири собиқ президент Саакашвили тарафдорларининг инқилобий сценарийлари ва провокацияларига йўл қўйилмаслигини айтди
30 октябрь куни Грузияда муниципал сайловларнинг икккинчи босқичи бўлиб ўтади. Михаил Саакашвилининг Бирлашган миллий ҳаракат партияси аъзолари шу куни ҳибсда сақланаётган сиёсатчини озод қилишни талаб қилиб, кенг кўламли митинг ўтказмоқчи, дея хабар бермоқда РИА Новости.
«Одатда, биз нафрат сўзлари ҳақида гапирганимизда, биринчи навбатда «Бирлашган миллий ҳаракат»ни эслаймиз. Бу одамлар тўққиз йил давомида мамлакатни нафрат, қийноқ билан бошқарган, аҳоли билан бўлган барча даҳшатли воқеалар ўша пайтда содир бўлган. Мен фақатгина бир нарсани айтмоқчиман. Мамлакатда инқилоблар ва урушлар даври тугади. Биз энди провокацияга йўл қўймаймиз», — дея таъкидлаган Грузия бош вазири матбуот анжуманида.
Михаил Саакашвили 1 октябрда Тбилисига қайтиши биланоқ ҳибсга олинган эди. Унга нисбатан бир нечта жиноий иш қўзғатилган. У 2004 йилдан 2013 йилгача Грузия президенти бўлган ва ўз ваколат муддати тугашидан бироз олдин мамлакатни тарк этган. Шундан сўнг, унга нисбатан тўртта жиноий иш қўзғатилган, улардан иккитасига суд ҳукми чиқарилган. 2018 йилда банкир Сандро Гиргвлианининг ўлдирилиши ва депутат Валерий Гелашвилининг калтакланиши бўйича Саакашвили сиртдан суд қилинди. Биринчисида у уч йилга, иккинчисида олти йилга озодликдан маҳрум этилган.
Халқаро банклар УЕФАнинг пандемиядан кейинги 7 млрд евролик молиявий дастурида иштирок этиш учун рақобатлашмоқда
АҚШнинг Goldman Sachs, Австралиянинг Macquire ва Apollo хусусий инвестиция компаниялари УЕФАнинг пандемиядан кейинги 7 млрд евролик молиявий дастурида иштирок этиш учун рақобатлашмоқда. Бу ҳақда Financial Times нашри хабар берди. Хабарда айтилишича, тендерда қатнашган яна бир банк — Италиянинг UniCredit банки тендернинг биринчи туридан сўнг қисқа рўйхатга кира олмаган. АҚШнинг Citi банки ҳам УЕФА билан музокаралар олиб борган, лекин биринчи босқичга ариза топширгани аниқ эмас.
Ушбу ёрдам дастури орқали УЕФА Чемпионлар Лигасида иштирок этувчи Европа клубларини дастлабки босқичда 2 млрд евро миқдорида молиялаштириш жамғармасини яратиш кўзда тутилган. Кейинчалик эса ушбу жамғарма миқдори 7 млрд еврогача ўсиши кутилмоқда. Ташкилот ушбу жамғармадан иложи борича кўпроқ Европа клубларига кредит ставкаси 2% бўлган имтиёзли кредитлар бериш учун фойдаланмоқчи. Бироқ УЕФА ташкил этилаётган жамғармага қандай механизм ёрдамида маблағ жалб қилишни режалаштиргани ҳозирча аниқ эмас. Маълум бўлишича, УЕФА мусобақани трансляция қилиш ҳуқуқини сотиш орқали жамғарма маблағларининг бир қисмини таъминлашни режалаштирмоқда.
Қайд этилишича, ушбу дастур спорт лигалари ва ассоциациялари фаолиятини молиялаштириш масаласида молиявий институтларга ўтиш тенденциясидан далолат беради. Бу тенденция COVID-19 пандемияси даврида тезлашди. УЕФА президенти Александр Чеферин, Европа футболи кўп йиллик иқтисодий ўсиш пандемия сабабли тўхтаб қолганидан сўнг эндиликда «янги молиявий ҳақиқатга» дуч келиши мумкинлигини айтиб ўтди.
Чехия президенти соғлиғи туфайли ўз вазифасини бажара олмаётгани сабабли унинг ваколатлари олиб қўйилиши мумкин
Чехия парламентининг Сенати (юқори палатаси) 5 ноябрь куни йиғилиш ўтказади. Унда Милош Земандан президентлик ваколатларини олиб қўйиш бўйича овоз бериш ўтказилиши мумкин.
Сенат раҳбарига кўра, сенаторлар Чехия конституциясининг 66-моддасини амалга ошириш-оширмасликни кўриб чиқади. Унга кўра президентнинг вафоти ёки касаллиги муносабати билан унинг ваколатларининг бир қисми вақтинчалик сенат раҳбарига, яна бир қисми эса вакиллар палатаси спикерига ўтади. «Бошқа вариант, афсуски, йўқ — биз конституциянинг 66-моддасини қачон ва қай тарзда кучга киритишни муҳокама қилишимизга тўғри келади», — деди Милош Вистрчил.
77 ёшли Земан 10 октябрь куни Прагадаги марказий ҳарбий касалхонанинг жонлантириш бўлимига ётқизилган. Президент маъмурияти унинг соғлиғи ҳақида батафсил маълумот беришдан тийилмоқда ва давлат ташаббуси тақиқланганига ишора қилиб, унинг ташхиси ҳақида жамоатчиликка хабар бермаган. Прага қалъасининг бу позицияси жиддий танқидларга сабаб бўлди. Республика бош вазири Андрей Бабиш президент маъмурияти раҳбари Вратислав Минаржни истеъфога чиқишга чақирди — ТАСС.
