19 октябрь куни Халқаро медиа холлда бўлиб ўтган матбуот анжуманида Коррупцияга қарши курашиш агентлиги директори Акмал Бурхонов Коррупцияга оид жиноятларни содир этишда айбдор деб топилган шахсларнинг очиқ электрон реестрини ташкил этиш борасида амалга оширилаётган ишларга тўхталиб ўтди.
«Бу фуқароларнинг турли ҳуқуқларига таъсир қилишини инобатга олган ҳолда, буни қонун сифатида қабул қилиш таклифи билдирилди. Бугунги кунда биз Коррупцион жиноятларни содир этган шахсларнинг реестри тўғрисидаги қонун лойиҳасини ишлаб чиқдик. Насиб қилса, кейинги ҳафта жамоатчилик муҳокамасига қўямиз. Мана шу қонун асосида бу реестр юритилади», — деди у.
Акмал Бурхонов. Фото: Абдулло Ёдгоров / «Газета.uz».
Аввалроқ, президентнинг 6 июлдаги фармони билан 2022 йил 1 январдан бошлаб «Коррупцияга оид жиноятларни содир этишда айбдор деб топилган шахсларнинг очиқ электрон реестри юритилиши белгиланганди.
«Биз 1 январгача ҳам ҳуқуқий механизмини, ҳам тизимни яратиш, яъни, ўша очиқ электрон реестрда нималар кўрсатиши, фуқаролар учун нималар очиқ бўлиши устида ишлаяпмиз. Албатта унинг исми, шарифи, қайси коррупцион жиноятларни содир қилганлигини эълон қилиб борилади. Ҳозирча ҳаммаси режадагидек кетаяпти», — деди Акмал Бурхонов.
Эслатиб ўтамиз, президент фармонида мазкур реестрга кирган шахсларга давлат хизматига кириш ва давлат мукофотлари билан тақдирланиши тақиқланади.
Қолаверса, сайланадиган ва алоҳида тартибда тайинланадиган лавозимларга номзодларининг кўрсатилиши, давлат органлари ҳузуридаги жамоатчилик кенгашлари ҳамда идоралараро коллегиал органларнинг аъзоси бўлиш мумкин эмас.
Улар томонидан таъсис этилган ва (ёки) улар иштирокчиси ҳисобланган тадбиркорлик субъектлари давлат харидларида ва давлат-хусусий шериклик тўғрисидаги битимда иштирокчи (ижрочи) сифатида қатнаша олмайди. Шунингдек, давлат активларини хусусийлаштириш билан боғлиқ тендер ва танлов савдоларида иштирок этиши, давлат улуши 50 фоиздан юқори бўлган ташкилотлар ҳамда давлат таълим муассасаларида раҳбарлик лавозимларида фаолият юритиши тақиқланади.
