18 октябрь куни Apple компанияси томонидан ўтказилган Apple Event онлайн тақдимотида компания ўзининг янги MacBook Pro компьютерларини намойиш этди. Янги MacBook`ларга Apple компанияси томонидан энг сўнгги технологиялар асосида ишлаб чиқилган M1 Pro ва M1 Max процессорлари ўрнатилган. Шунингдек, тақдимотда янги HomePod Mini қурилмалари, AirPods 3 қулоқчинлари намойиш этилди.
M1 Pro ва M1 Max процессорлари
Ушбу иккита янги процессорлар Apple томонидан компаниянинг хусусий компьютерлари учун махсус ишлаб чиқилган. Янги процессорлар профессионал вазифаларни бажариш учун мўлжалланган бўлиб, аввалроқ Apple томонидан тақдим этилган M1 процессоридаги барча камчиликлар тўғирланган.
M1 Pro процессорлари секундига 200 гигабит тезликка тенг бўлган ички хотира кучига эга бўлиб, бу M1 процессорига нисбатан уч баробар тезроқдир. Шунингдек, M1 Pro 33 млрд транзисторга эга (M1 процессорига нисбатан икки баробар кўпроқ). Янги процессор 10 ядроли CPU (марказий процессор) ҳамда 16 ядроли график процессор кучига эга бўлиб, M1`га нисбатан самарадорлик кўрсаткичи 70%га кўпроқ.
M1 Max — Apple компанияси томонидан ишлаб чиқилган энг катта ва энг тез процессор ҳисобланади. Компаниянинг таъкидлашича, ушбу янги процессор ҳозирда мавжуд профессионал ноутбуклар орасида энг кучли процессор бўлиб турибди. M1 Max процессорлари секундига 400 гигабит тезликка тенг бўлган ички хотира кучига эга. Шунингдек, M1 Max энг катта бирлаштирилган (ягона) хотира ҳажмига эга процессор ҳисобланади — 64 ГБ. Янги процессор ўзида 10 ядроли CPU (марказий процессор) ҳамда 32 ядроли график процессор кучини мужассам этган. M1 Pro 57 млрд транзисторга эга бўлиб, олдинги процессорларга нисбатан 70%га камроқ қувват сарфлайди.
Apple`нинг таъкидлашича, янги процессорлар компьютерлар ва рақобатчи компаниялар ноутбукларидан икки баробар тезроқ ишлайди ҳамда камроқ қувват сарфлайди.
Янги процессор-чиплар айнан ушбу тақдимотда намойиш этилган Macbook Pro ноутбукларига қўйилади.
MacBook Pro
Apple тақдимотда ҳошиясиз дисплей ва камера учун махсус «кокили»га эга MacBook Pro ноутбукларини намойиш этди. MacBook Pro икки хил турда — 14 ва 16 дюймли версияларда сотувга чиқарилади.
MacBook Pro ноутбуклари Mini-LED янги технологиясига асосланган Liquid Retina XDR дисплейига эга бўлди. Apple янги ноутбукларга MagSafe магнитли қувватлаш технологиясини қайтарди. Ноутбук 30 дақиқа ичида 50% қувват олиш имкониятига эга. MacBook`ларнинг ўтган йилги версиясида олиб ташланган бир қатор қулайликлар — SD-хотира учун уя ва ташқи экранларни улаш учун HDMI-порт кабилар янги ноутбукларга қайтарилган. Яъни компания ўтган йилги тақдимотдан кейинги бир қатор танқидлар ва фойдаланувчилар фикрини ҳисобга олган.
Янги MacBook`лар, шунингдек, қора ҳошияга эга Magic Keyboard клавиатураси билан жиҳозланган. Apple бу сафар аудио устида жиддий ишлаган ва ушбу ноутбуклардаги янги тизим компаниядаги барча ноутбуклардагидан кучлироқ ҳамда жарангдорроқ эканлиги айтилмоқда.
MacBook Pro`нинг энг кучли версияси 64 Гб бирлаштирилган (ягона) хотирага эга бўлиб, бир вақтнинг ўзида 30 гача қатордан иборат 4K видеони ёки 8K сифатли 7 қаторли видеотасмани монтаж қила олиш кучига эга.
Компаниянинг таъкидлашича, MacBook Pro`дан аккумуляторга улаган ҳолда фойдаланаётганда иш сифати ва ишлаш тезлиги ёмонлашмайди. MacBook Pro лэптопининг 14 дюймли моделида қувват видео кўриш ҳолатида 17 соатгача, 16 дюймли моделида эса 21 соатгача етади.
Қурилма иккита вентиляторли янги совутиш тизими билан жиҳозланган, бу корпус орқали аввалгидан 50%га кўпроқ ҳаво ўтказиш имконини беради. Apple MacBook`нинг ички қисмини оптималлаштирди ва юқори қувватда ишлаётган пайтда ҳам ҳеч қандай товуш ёки иссиқлик чиқармаслиги таъкидланмоқда.
MacBook Pro`нинг 14 дюймли моделининг бошланғич баҳоси $1999, 16 дюймли моделининг нархи эса $2499 деб баҳоланмоқда. Буюртмалар эса 18 октябрдан қабул қилина бошланди.
Бундан ташқари, тақдимотда AirPods Pro симсиз қулоқчинларининг учинчи авлоди намойиш этилди. Янги қулоқчинлар сув ўтказмайдиган ҳимоя қопламига эга бўлди ва фазовий аудио функцияси билан янгиланди. Компаниянинг таъкидлашича, AirPods Pro`нинг қуввати 6 соат танаффусларсиз мусиқа эшитишга етар экан. Қувватлантирувчи қутичадан фойдаланган ҳолда эса қулоқчинлар қуввати 30 соатгача етиши мумкин. Янги қулоқчинлар $179 дея баҳоланмоқда ва улар келаси ҳафтадан бошлаб сотувга чиқарилади.
Шунингдек, Apple ўзининг Siri ёрдамчи-тизимига бирлаштирилган янги «ақлли» карнайларини — HomePod mini`ларни намойиш этди. Ушбу қурилма Apple HomePod`нинг кичрайтирилган версияси бўлиб, у Bluetooth орқали мусиқа эшитиш имконини беради. HomePod mini «ақлли» карнайларини уйдаги барча Apple қурилмалари билан бирлаштириш ёки карнай орқали уларни бошқариш мумкин. Ушбу қурилманинг нархи $99 дея баҳоланмоқда.
Сентябрь ойидаги тақдимотда Apple янги iPhone 13, iPad ва соатларини тақдим этган эди.
