Жаҳон соғлиқни сақлаш ташкилоти (ЖССТ) иммун тизими заиф бўлган кишиларга коронавирусга қарши вакцинанинг қўшимча дозасини юборишни тавсия қилди. Бу ҳақда БМТ янгиликлар хизмати хабар бермоқда.

ЖССТнинг эмлаш бўйича Стратегик маслаҳат гуруҳи экспертлари ЖССТ томонидан тасдиқланган ҳар қандай вакциналарнинг қўшимча дозасини иммунитети мўтадил ёки кучли заифлашган шахсларга таклиф қилиш мумкинлигини таъкидлашди. Чунки улар учун стандарт бирламчи эмлаш етарли бўлмаслиги мумкин ва уларда COVID-19`нинг оғир шакли билан касалланиш хавфи юқори.

Бундан ташқари, экспертлар Хитойнинг Sinovac ва Sinopharm вакциналари билан эмланган 60 ва ундан катта ёшдагиларга ҳам учинчи дозани олишни тавсия қилишди. Улар бошқа тасдиқланган препаратлар билан учинчи дозани қилиш мумкинлигини ҳам таъкидлашди.

Олдинроқ ЖССТ камбағал мамлакатларда вакциналар етишмовчилигидан хавотирланиб бой мамлакатларни коронавирусга қарши қайтадан эмлашга мораторий жорий қилишга чақирган эди. Сентябрь ойининг бошида ЖССТ раҳбари Тедрос Гебрейесус дунё бўйлаб қилинган умумий вакциналарнинг 75% ривожланган мамлакатларда қилинганлигини таъкидлаган эди.