Россия ҳукумати Ўзбекистондан 10 минг қурувчини мамлакатга жалб этиш бўйича тажриба лойиҳасини маъқуллагани ҳақида хабар берилган эди. Лойиҳа иштирокчилари суҳбат ва тиббий кўрикдан ўтишлари, шунингдек рус тили, Россия тарихи ва қонунчилиги асосларини билиши тўғрисидаги сертификатга эга бўлишлари кераклиги айтилган.
Шунингдек, улар коронавирусга қарши «Спутник лайт» препарати ёки бошқа вакциналар билан эмланиш ёхуд кетишдан беш ойгача бўлган муддатда касалликни бошдан кечиргарлик тўғрисидаги ҳужжатнинг мавжуд бўлиши ҳам мажбурий талаб ҳисобланиши кўрсатилган.
Ўзбекистон ССВ ахборот хизматига кўра, Россия ССВ томонидан меҳнат миргантларини эмлаш учун янги турдаги «Спутник Лайт» вакцинасининг 12 минг дозаси Ўзбекистонга олиб келинди.
Қайд этилишича, «Спутник Лайт» бир компонентли вакцина бўлиб, у билан тўлиқ эмланиш учун вакцинанинг бир дозасини олиш кифоя қилади.
Ушбу вакцина билан фақат Ўзбекистондан юборилиши мўлжалланган 10 минг нафар қурувчи мигрантлар эмланади. Вакцинация жараёни россиялик тиббиёт ходимлари томонидан амалга оширилади.
Кеча Россияда ишлаш ҳуқуқини берувчи патентни олишда талаб этиладиган тиббий кўрик Россия ССВ томонидан Ўзбекистонда ўтказилиши ҳақида хабар берилганди. Шу муносабат билан Россиянинг 40 нафар тиббиёт ходими Тошкентга келган.
Июнь ойи охирида Москвада мигрантларни коронавирус инфекциясига қарши вакцинация жараёнлари бошлангани ҳақида хабар берилган эди. Улар ҳам «Спутник Лайт» билан эмланган ва вакцина учун тўлов иш берувчи томонидан амалга оширилиши белгиланган.
